VAQON TƏMİRÇİLƏRİ AHƏNGDAR İŞLƏYİRLƏR
Bu il Bakı vaqon təmiri zavodunun 110 yaşı tamam olur. Müəssisə mövcud olduğu bu müddət ərzində qarşısına qoyulmuş vəzifələri layiqincə yerinə yetirmişdir. Keçmiş Sovet İttifaqı dövründə zavod neftdaşıyan sisternləri təmir etmək üçün 92 müəssisə ilə müqavilələr bağlayırdı. Ölkəmizin dövlət müstəqilliyinin ilk illərində keçmiş iqtisadi sistemi dağılmağa başlayanda da Bakı vaqon təmiri zavodunda istehsal prosesləri və texniki proseslər əvvəlki ahənglə davam etmiş, çoxmillətli kollektivi və yüksək əmək intizamı qorunub saxlanmışdır.
Azərbaycan Prezidenti Heydər Əliyevin rəhbərliyi ilə ölkədə geniş iqtisadi islahatlar aparıldığı, neft strategiyasının həyata keçirildiyi bir vaxtda da zavodda neft sənayemiz üçün çox lazım olan neftdaşıyan sisternlərin əsaslı təmiri üçün çox iş görülür. Zavod kollektivi 2002-ci ilin ilk 6 ayı ərzində 165 əvəzinə 181 sistern və vaqonu əsaslı təmir etmişdir. Yerli sənaye müəssisələrinin də bu zavodun xidmətlərinə tələbatı böyükdür. Müəssisə onların ehtiyaclarını ödəmək üçün ilin birinci yarısında müxtəlif profilli 47 vaqon təmir etmişdir.
11 ildir zavoda baçşılıq edən Kamal Əhmədzadə AZƏRTAC-ın müxbirinə bildirmişdir ki, müəssisənin kollektivi Azərbaycan Prezidentinin dövlətimizin müstəqilliyinin möhkəmlənməsinə, xalqımızın rifahının yüksəldilməsinə yönəlmiş siyasətini tam dəstəkləyirlər. Buna görə də onlar avqustun 24-də yüksək vətəndaşlıq fəallığı nümayiş etdirəcək, Azərbaycanda demokratik cəmiyyətin tam bərqərar olması, əsl hüquqi dövlət quruculuğu naminə ümumxalq səsverməsində iştirak edəcəklər.
Bölmənin digər xəbərləri
