Vətən müharibəsinin hər günü bizim şanlı tariximizdir
Şabran, 18 avqust, Elxan Yusifli, AZƏRTAC
Azərbaycan Vətən müharibəsində parlaq qələbə qazanaraq Ermənistanı məğlub edib, 30 illik işğala son qoydu. 44 gün davam edən döyüşlərin hər anı bizim şanlı tariximizdir.
AZƏRTAC-ın bölgə müxbiri xəbər verir ki, bu barədə Şabran Tarix-Diyarşünaslıq Muzeyində keçirilən "Zəfər yolunun fədailəri" adlı tədbirdə bildirilib.
Tədbirdə Xaçmaz Regional Mədəniyyət İdarəsinin əməkdaşları, şəhid ailələri, qazilər, mədəniyyət işçiləri və rayon ictimaiyyətinin nümayəndələri iştirak ediblər.
Muzeyin direktoru Bəsti Məmmədova çıxışında torpaqlarımızın azadlığı uğrunda canını fəda edən qəhrəman Vətən oğullarını yad edib, Ali Baş Komandanın rəhbərliyi ilə qazanılan şanlı qələbədən danışıb.
Bildirilib ki, 2020-ci ilin 27 sentyabr tarixindən başlayaraq Müzəffər Ali Baş Komandan İlham Əliyevin rəhbərliyi ilə Azərbaycanın həm döyüş meydanında, həm də diplomatik danışıqlarda qazandığı zəfərlər hər bir vətəndaşımızda böyük fəxarət hissi yaradıb. Otuzillik həsrətə son qoyan bu əzəmətli Qələbə düşmən işğalında olan əzəli torpaqlarımızın azad edilməsi və ərazi bütövlüyümüzün təmin olunması ilə yekunlaşıb. Milli birliyimizi və həmrəyliyimizi daha da gücləndirən bu əlamətdar hadisə müasir Azərbaycan tarixinin şanlı səhifələrinin yazılması ilə yadda qaldı.
Çıxışlarda qeyd olunub ki, torpaqlarımızın azadlığı uğrunda canını fəda edən şəhidlərimizin ailələrinə, həmçinin müharibə əlillərinə yüksək səviyyədə diqqət və qayğı göstərilir. Ali Baş Komandan İlham Əliyevin və Birinci vitse-prezident Mehriban Əliyevanın müvafiq göstərişlərinə əsasən dövlət qurumları bu kateqoriyadan olan insanların problemləri ilə yaxından maraqlanır, onların problemlərinin aradan qaldırılması üçün mütəmadi olaraq tədbirlər görürlər.
Tədbirdə Şabran Xalq Teatrının aktyoru Nurlan Fərhadlının ifasında "Azərbaycan əsgəri zəfərin mübarək" şeiri səsləndirilib, şəhidlərimizə həsr olunan videoçarx təqdim edilib.
Tədbir iştirakçıları "Şəhidlər unudulmur" adlı sərgi ilə də tanış olublar.
Bölmənin digər xəbərləri
