VƏTƏNDAŞLARDAN NARKOTİK VASİTƏLƏR GÖTÜRÜLMÜŞDÜR
Daxili İşlər Nazirliyinin mətbuat xidmətindən AZƏRTAC-a bildirmişlər ki, Narkotiklərlə Mübarizə Baş İdarəsinin əməkdaşları Lənkəran şəhər sakinləri - əvvəllər məhkum olunmuş Həmid Təhməzovdan 6,281 qram, Nazim Abdullayevdən 1,008 qram heroin aşkar edərək götürmüşlər.
Narkotiklərlə Mübarizə Baş İdarəsi və Ağstafa Rayon Polis Şöbəsi əməkdaşlarının birgə keçirdikləri əməliyyat tədbirləri nəticəsində Qarahəsənli kənd sakini, əvvəllər məhkum olunmuş İlqar Xəlilovun evinə baxış zamanı 9 kiloqram 952,58 qram marixuana götürülmüş, həyətyanı sahəsindən isə çəkisi 4,1 kiloqram olan 3 ədəd çətənə kolu aşkar edilərək məhv edilmişdir.
Narkotiklərlə Mübarizə Baş İdarəsinin Qərb Bölgəsi üzrə Regional Şöbəsinin və Göygöl Rayon Polis Şöbəsinin əməkdaşları Qızıl Qaya qəsəbəsi ərazisində yabanı halda bitmiş, çəkisi 3,289 ton olan 2084 ədəd, Nəqliyyatda Baş Polis İdarəsinin əməkdaşları isə Zaqatala hava limanı ərazisində yabanı halda bitmiş, çəkisi 693 kiloqram olan 3526 ədəd çətənə kollarını yığaraq məhv etmişlər.
Faktlarla bağlı araşdırmalar aparılır.
Bölmənin digər xəbərləri
