Vistula Universitetinin tələbələri Dağlıq Qarabağ münaqişəsi haqqında məlumatlandırılıblar
Bakı, 16 yanvar, AZƏRTAC
Varşavada fəaliyyət göstərən Vistula Universitetində Ermənistan-Azərbaycan, Dağlıq Qarabağ münaqişəsinə həsr edilən tədbir keçirilib.
Azərbaycanın Polşadakı səfirliyindən AZƏRTAC-a verilən məlumata görə, tədbirdə Vistula Universitetinin müəllim və tələbə heyəti, Polşada fəaliyyət göstərən bir sıra araşdırma mərkəzlərinin mütəxəssisləri iştirak ediblər.
Universitetin beynəlxalq əlaqələr institutunun direktoru, professor Longin Pastusiak Dağlıq Qarabağ münaqişəsinin tarixi haqqında məlumat verib. O, münaqişə nəticəsində Azərbaycan ərazisinin 20 faizinin işğal olunduğunu diqqətə çatdırıb.
Doktorant Sənnur Əliyev xalqımızın tarixinə qanlı hərflərlə yazılmış 20 Yanvar faciəsindən danışıb. Bu faciənin keçmiş sovet məkanında insanlığa qarşı törədilmiş ən qanlı hadisə olduğunu qeyd edib.
Qafqaz Universitetindəki humanitar və ictimai elmlər institutunun elmi işçisi Şamxal Əbilov “Dağlıq Qarabağa ümumi tarixi baxış: Azərbaycanın mövqeyi” adlı məruzəsində ermənilərin Azərbaycanın əzəli torpaqlarına köçürülməsi tarixindən söhbət açıb.
Tədbir müzakirələrlə davam edib.
Azərbaycanın Polşadakı səfirliyinin Dağlıq Qarabağ münaqişəsi ilə bağlı polyak dilində nəşr etdirdiyi kitablar və 20 Yanvar faciəsi haqqında polyak dilində çap olunan açıqca seminar iştirakçılarına paylanılıb.
Bölmənin digər xəbərləri
