Vladimir İmnadze: Azərbaycanın əlil idmançıları builki yarışlara daha yaxşı hazırlaşıblar
Tbilisi, 6 avqust, AZƏRTAC
Biz Azərbaycanın “Qarabağ qaziləri” amputant futbol komandasının Gürcüstanda keçirilən yarışlarda iştirakından çox razıyıq. Onların müxtəlif yarışlarda iştirakı çox sevindiricidir.
AZƏRTAC xəbər verir ki, bunu Gürcüstanın Veteranlarla İş üzrə Dövlət Xidmətinin direktoru Vladimir İmnadze jurnalistlərə açıqlamasında deyib.
O bildirib ki, azərbaycanlı idmançılar ötən illə müqayisədə bu il daha hazırlıqlı görünürlər. “Azərbaycan” komandası ilk qarşılaşmalarda da güclü oyun nümayiş etdirib.
V.İmnadze qeyd edib ki, əlil idmançılar arasında istənilən yarışların təşkili çox önəmlidir. Yarışlarda iştirak edən fiziki imkanları məhdud idmançılar özlərini cəmiyyətdən təcrid olunmuş hesab etmirlər.
Qeyd edək ki, Gürcüstanda əlil futbolçular arasında ötən gün start verilən yarışda Qarabağ qazilərindən ibarət “Azərbaycan” komandası iştirak edib. Qazilər Qori şəhərinin “Kartli” komandası ilə keçirdikləri ilk görüşdə 1:0 hesabı ilə qalib gəliblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
