“Williams” komandası “Dorilton Capital” investisiya şirkətinə satılıb
Bakı, 21 avqust, AZƏRTAC
Formula 1 üzrə dünya çempionatının iştirakçısı “Williams” komandası Amerika investisiya şirkəti “Dorilton Capital”a satılıb.
AZƏRTAC xəbər verir ki, bu barədə komandanın mətbuat xidməti məlumat yayıb.
Klub rəhbərliyi razılaşmanın onlara maddi cəhətdən kömək edəcəyinə və 2021-ci ildə qüvvəyə minəcək Formula 1 müqaviləsi çərçivəsində daha uğurla çıxış etməyə imkan verəcəyinə ümid bəsləyir.
“Williams” cari çempionatda bir xal belə qazana bilməyən yeganə komandadır. Komanda 1970-ci ildən Formula 1-də çıxış edir və indiyə qədər 750 Qran-Pridə iştirak edib. “Williams” komandası Konstruktorlar Kubokunda 9 dəfə qələbə qazanıb. Klubun pilotları isə fərdi yarışlarda 7 dəfə qalib olublar.
Bölmənin digər xəbərləri
