Samir Əliyev: “Qarabağ” mərhələ adlayaraq öz işinin öhdəsindən gəldi
Bakı, 14 avqust, AZƏRTAC
Səfərdəki oyunla evdəki qarşılaşma arasında fərq var idi. “Qarabağ” doğma divarlar arasında daha inamlı təsir bağışladı. Bununla belə, yeni futbolçuların komandaya tam uyğunlaşması üçün müəyyən zaman lazımdır.
Bu sözləri AZƏRTAC-a açıqlamasında Azərbaycanın veteran futbolçusu Samir Əliyev “Qarabağ”ın UEFA Konfrans Liqasının III təsnifat mərhələsinin cavab oyununda Kiyev “Dinamo”sunu 2:0 hesabı ilə məğlub edərək pley-offa yüksəlməsi barədə danışarkən deyib.
O bildirib ki, futbolda hər matçda mütləq qələbə qazanmaq kimi bir şərt yoxdur: “Bəzən məğlubiyyətlər də qaçınılmaz olur. “Qarabağ”ın bir çox aparıcı futbolçusu komandadan ayrılıb, heyətə yeni oyunçular cəlb olunub. Onlar tam adaptasiya dövrü keçməyiblər. Bu baxımdan səfərdəki və evdəki oyunlar arasında fərqin olması təbiidir”.
Samir Əliyev qeyd edib ki, Ukrayna təmsilçisi əvvəlki əzəmətindən uzaqdır və əsasən gənc futbolçulara güvənir: “Dinamo” ən yaxşı günlərini yaşamır. “Qarabağ”a mərhələ adlamaq lazım idi və bunun da öhdəsindən gəldi”.
Qeyd edək ki, “Qarabağ” səfərdə “Dinamo”ya 0:1 hesabı ilə məğlub olsa da, evdə rəqibini 2:0 hesabı ilə məğlub edərək pley-off mərhələsinə yüksəlib. Ağdam təmsilçisinin növbəti mərhələdəki rəqibi Niderlandın "Tvente" komandası olacaq. Pley-offun ilk oyunları avqustun 20-də, cavab görüşləri isə 27-də keçiriləcək.
Bölmənin digər xəbərləri
