Nursu – Məmməd Arazın doğma yurdunda tarixlə gələcək qovuşur
Bakı, 14 avqust, AZƏRTAC
Naxçıvan Muxtar Respublikası Şahbuz rayonunun Nursu kəndi qədim tarixi, zəngin təbiəti və ədəbi-mədəni irsi ilə seçilir. Xalq şairi Məmməd Arazın doğulduğu bu dağ kəndində tarixlə müasirlik, milli-mənəvi dəyərlərlə yeni inkişaf imkanları bir arada yaşadılır. Dövlət qayğısı ilə kəndin inkişafı üçün yaradılan imkanlar isə Nursunun gələcəyinə inamı daha da artırır.
Nursu kənd sakini, ədəbiyyat müəllimi Elvin İbrahimov AZƏRTAC-a müsahibəsində doğma kəndi, onun tarixi, təbiəti, insanları və keçmişdən bu günə qədər qorunub saxlanılan dəyərləri barədə təəssüratlarını bölüşüb. O bildirib ki, bu gün Nursu yalnız öz tarixi və mədəni irsi ilə deyil, burada yaşayan insanların dövlət qayğısını gündəlik həyatlarında hiss etməsi ilə də diqqət çəkir. Azərbaycanda regionların, o cümlədən Naxçıvan Muxtar Respublikasının sosial-iqtisadi inkişafına yönəlmiş ardıcıl dövlət siyasəti kənd və rayonların yenilənməsi və inkişafı üçün geniş imkanlar yaradır. Prezident İlham Əliyevin Naxçıvana səfəri zamanı qəbul edilən qərarlarda Nursu kəndinin də diqqətdə saxlanılması dövlətimizin başçısının Naxçıvanın, eləcə də onun yaşayış məntəqələrinin inkişafına göstərdiyi xüsusi diqqət və qayğının daha bir nümunəsidir. Nursunun belə mühüm qərarların əhatə dairəsinə daxil edilməsi kəndin gələcək inkişafı, infrastrukturunun yenilənməsi və sakinlərin yaşayış şəraitinin daha da yaxşılaşdırılması baxımından böyük əhəmiyyət daşıyır.
Nursunun timsalında qədim tarixlə müasir inkişafın vəhdətini aydın şəkildə görmək mümkündür. Bir tərəfdə əsrlərin yaddaşını yaşadan qədim kənd, onun zəngin təbiəti, milli-mədəni irsi və Məmməd Araz kimi böyük şəxsiyyət yetişdirən mənəvi mühiti, digər tərəfdə isə müasir Azərbaycanın inkişaf strategiyasının yaratdığı yeni imkanlar dayanır. Bu vəhdət Nursunun dünənini yaşatmaqla yanaşı, onun sabahına da inamla baxmağa əsas verir. Bu gün Nursu sakinləri doğma kəndlərinin gələcəyinə inamla baxırlar. Çünki dövlət siyasətinin əsas məqsədlərindən biri yalnız iri şəhərlərin deyil, ən ucqar yaşayış məntəqələrinin də inkişafına şərait yaratmaq, insanların rahat və firavan yaşaması üçün zəruri imkanları formalaşdırmaqdır. Nursu da bu diqqət və qayğının ünvanlarından biridir. Dövlət qayğısı bu qədim yaşayış məskəninin müasir dövrün tələblərinə uyğun yenilənməsinə və daha da abadlaşmasına xidmət edir.
Nursunun təbiəti kəndin tarixindən heç də geri qalmır. Dağlarla əhatələnən yaşayış məntəqəsinin ətrafında Toğluqaya, Motalqaya, Çadırdaş, Hamar Quzey, Cacıqlı kimi yüksəkliklər və ərazilər yerləşir. Kəndin Kazımbulaq, Qubadbulaq, Yeddibulaq, Şahbulaq kimi bulaqları isə onun təbii simasının ayrılmaz hissəsidir. Nursu həm də tarixi yaddaşın qorunduğu kəndlərdəndir. Kənd ərazisində qədim qəbiristanlıq, müxtəlif qəbirüstü daşlar və yerli əhalinin yaddaşında yaşayan tarixi məlumatlar mövcuddur. Yaşlı sakinlərin söylədiyi məlumatların, qədim yer adlarının öyrənilməsi Nursunun keçmişinin daha dərindən araşdırılmasına imkan verə bilər.
Elvin İbrahimov deyir: “Bu kəndin hər daşında bir xatirə, hər cığırında bir iz var. Nursunu yalnız yaşayış məntəqəsi kimi təqdim etmək düzgün olmazdı. Bura tariximizin, ədəbiyyatımızın və milli yaddaşımızın bir parçasıdır. Məmməd Arazın bu torpaqda doğulması isə kəndimizə xüsusi mənəvi məsuliyyət verir”.
Kəndin adını daşıyan Nursuçay isə Şahbuz rayonunda Naxçıvançayın sol qolu kimi qeyd olunur. Bu faktlar kəndin qədim yaşayış məskəni olduğunu və onun adının əsrlər boyu bölgənin coğrafi yaddaşında yaşadığını göstərir.
“Nursunun turizm imkanları kifayət qədər genişdir. Burada həm təbiət, həm tarix, həm də ədəbi irs var. Məmməd Arazın doğulduğu kənd olması özü böyük bir dəyərdir. Dağ marşrutları, bulaqlar, qədim qəbiristanlıq, yerli rəvayətlər və şairin irsi əsasında maraqlı turizm marşrutu yaratmaq mümkündür.
Nursu keçmişi ilə fəxr etməklə yanaşı, gələcəyə də baxmalıdır. Yol, rabitə, enerji, sosial obyektlər və digər infrastruktur məsələləri inkişaf etdikcə kəndin imkanları da genişlənəcək”, - deyə Elvin İbrahimov bildirib.
Məmməd Arazın yaradıcılığında Vətən, torpaq, dağ, insan və milli yaddaş mövzuları xüsusi yer tutur. Şairin doğulduğu kənd bu baxımdan yalnız coğrafi məkan deyil, onun poetik dünyasının formalaşdığı doğma yurddur. Bu gün Nursuda yaşayan insanlar doğma kəndin tarixi irsini qorumaqla yanaşı, onun müasir inkişafını da istəyirlər. Kəndin təbii imkanlarından səmərəli istifadə, yaşıllıqların qorunması, bulaqların abadlaşdırılması, tarixi məkanların öyrənilməsi və turizm imkanlarının genişləndirilməsi Nursunun gələcək inkişafına töhfə verə bilər.
Bu kənddə insan həyatı dağlarla, bulaqlarla, torpaqla və zəhmətlə sıx bağlıdır. Hər bir əhvalat, hər bir yer adı və hər bir qədim daş Nursunun böyük tarixinin kiçik bir parçasıdır.
Nursu – tarixini yaşadan, təbiətini qoruyan və dövlət qayğısı ilə gələcəyə inamla addımlayan qədim Azərbaycan kəndidir. Məmməd Arazın doğma yurdu olan bu dağ kəndi milli-mənəvi dəyərlərini yaşadaraq yeni inkişaf mərhələsinə qədəm qoyur.
Müxbir - Tünzalə Arazlı
Bölmənin digər xəbərləri
