Xaçmaz və Masallıda maarifləndirici aksiya keçirilib
Bakı, 27 avqust, AZƏRTAC
İqtisadiyyat Nazirliyinin təşəbbüsü, Kiçik və Orta Biznesin İnkişafı Agentliyinin (KOBİA) təşkilatçılığı, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının və özəl sektorun ("Mətanət A", Neftçala Avtomobil Zavodu, "A.M.O." MMC) dəstəyi ilə vətəndaşların koronavirus infeksiyasının profilaktikasına dair maarifləndirilməsi tədbirlərinə dəstək məqsədilə sosial aksiya davam edir.
Nazirliyin mətbuat xidmətindən AZƏRTAC-a bildirilib ki, növbəti maarifləndirici aksiya Xaçmaz və Masallı rayonlarında təşkil olunub. Aksiya zamanı “KOB Dostu” və könüllülər tərəfindən ticarət və xidmət obyektlərinə yaxın yerlərdə, parklarda vətəndaşlarla karantin rejimi qaydalarına dair maarifləndirici söhbətlər aparılıb, onlara tibbi maska paylanılıb.
Dövlət-biznes əməkdaşlığı çərçivəsində həyata keçirilən maarifləndirici aksiya iyul ayından başlayıb və 20-yə yaxın şəhər və rayonu əhatə edəcək. Qarşıdakı günlərdə aksiya Salyan, Quba, Qusar, Ağdaş, Şəki, Şamaxı, Gəncə, Naftalan və Ağcabədidə təşkil olunacaq.
Qeyd edək ki, indiyədək maarifləndirici aksiya ölkənin 11 şəhər və rayonunda təşkil olunub və aksiya çərçivəsində vətəndaşlara, ümumilikdə 15 min 700-ə yaxın tibbi maska paylanılıb.
Bölmənin digər xəbərləri
