Bakı, 1 dekabr, AZƏRTAC

AZƏRTAC müasir müstəqil Azərbaycan dövlətinin banisi, görkəmli siyasi və dövlət xadimi Heydər Əliyevin 100 illik yubileyi ilə əlaqədar xalqımızın Ulu Öndərinin parlaq, zəngin və şərəfli həyat yolunun əsas məqamlarını, bənzərsiz siyasi və dövlətçilik fəaliyyətini - xalqa bağışlanmış ömrünün anlarını xronoloji ardıcıllıqla təqdim edir.

X X X

3-5 may. Azərbaycan Respublikasının Prezidenti Heydər Əliyev Belçikada rəsmi səfərdə oldu.

6 may. Cəbhə bölgəsində yaranmış vəziyyətlə əlaqədar selektor müşavirəsi keçirdi.

9 may. Bakı Ümumqoşun Komandirləri Məktəbində Həzi Aslanovun abidəsinin açılışında və C.Naxçıvanski adına ixtisaslaşdırılmış hərbi məktəbdə nitq söylədi.

12 may. Kənd təsərrüfatı məsələlərinə həsr olunmuş müşavirə keçirdi.

14 may. Türkiyə Xarici İşlər Nazirliyinin nümayəndəsini qəbul etdi.

15 may. ABŞ Dövlət katibinin xüsusi müşaviri Ceyms Kollinzin başçılıq etdiyi nümayəndə heyəti ilə görüşdü.

17 may. Beynəlxalq Valyuta Fondunun Azərbaycandakı icraçı direktorunu qəbul etdi.

18 may. Milli Məclisin respublikada yaranmış ictimai-siyasi vəziyyətin müzakirəsinə həsr olunmuş iclasında iştirak etdi.

20 may. Əhalinin sosial müdafiəsini gücləndirmək və iqtisadiyyatın maliyyə vəziyyətinin sabitləşməsini təmin etmək tədbirlərinə həsr olunmuş müşavirə keçirdi.

21 may. Qurban bayramı münasibətilə Bibiheybət ziyarətgahında oldu, Zuğulbadakı pansionatda məskunlaşmış qaçqınlarla görüşdü.

22 may. Cəbhə bölgəsində yaranmış vəziyyətlə əlaqədar selektor müşavirəsi keçirdi.

23 may. Böyük Britaniyanın energetika nazirini qəbul etdi.

24 may. Bakıda Xəzər neft-qaz hasilatına dair “Xəzərneftqaz” I beynəlxalq sərginin açılışında çıxış etdi.

Xarici ölkələrin neft şirkəti və korporasiya rəhbərləri ilə görüşdü.

27 may. Respublika Gününə həsr olunmuş təntənəli yığıncaqda nitq söylədi.

28 may. Şəhidlər xiyabanını ziyarət etdi, şəhid anaları ilə görüşdü.

X X X

Ulu öndər Heydər Əliyev müstəqil Azərbaycan Respublikasının beynəlxalq birliyin tamhüquqlu üzvü olması üçün aparıcı beynəlxalq təşkilatlarla, o cümlədən NATO ilə əməkdaşlığa böyük əhəmiyyət verirdi. Azərbaycanın NATO-nun “Sülh naminə tərəfdaşlıq” proqramına qoşulması üçün 1994-cü il mayın 3-dən 5-dək Belçikada rəsmi səfərdə oldu. Brüsseldə NATO Şurasının iclasında çıxış etdi, habelə Belçikanın Baş naziri Jak-Lük Dean, NATO-nun baş katibinin birinci müavini Serco Balantsino və Alyansın digər rəhbərləri ilə görüşlər keçirdi.

NATO Şurasının iclasında çıxış edən Heydər Əliyev Azərbaycanın daxili və xarici siyasətinin əsas prinsiplərini açıqladı.

Sitat: Azərbaycan daxili siyasətdə demokratik hüquqi dövlət quruculuğu yolu tutur, bəşəriyyətin nail olduğu demokratik dəyərlərdən istifadə etməklə şəxsiyyət azadlığı və insan hüquqlarının müdafiəsi, çoxpartiyalı sistem, siyasi plüralizm üçün şərait yaradır...

Azərbaycan Respublikası özünün xarici siyasətində dünyanın qarşılıqlı əlaqələri, qarşılıqlı asılılıq prinsipini əsas tutur, sülhsevər siyasət yeridir və suverenliyə hörmət etmək, bir-birinin daxili işlərinə qarışmamaq, ərazi bütövlüyünə və sərhədlərin toxunulmazlığına əməl etmək prinsipləri zəminində bütün ölkələrlə mehriban münasibətlər saxlamağa çalışır.

Heydər Əliyev Brüsseldə NATO-nun “Sülh naminə tərəfdaşlıq” proqramının çərçivə sənədini imzaladı və bununla da NATO-Azərbaycan əlaqələrinin inkişaf etdirilməsi üçün əlverişli şərait yarandı. Orada keçirdiyi mətbuat konfransında Azərbaycanın bu proqrama qoşulmasını, Avropaya inteqrasiyasını genişləndirməyi vacib hesab etdiyini bildirdi: “Biz bu sənədi imzalayarkən onu əsas tuturuq ki, gənc müstəqil Azərbaycan dövləti öz istiqlaliyyətini möhkəmlətmək yolu ilə, demokratiya, bazar iqtisadiyyatı yolu ilə, dünya birliyi, xüsusən Avropa, Qərb ilə inteqrasiyanı daha da genişləndirmək yolu ilə gedərək, “Sülh naminə tərəfdaşlıq” sənədi əsasında NATO ilə əməkdaşlıq şəraitində öz qarşısında duran vəzifələri yerinə yetirmək üçün daha geniş imkanlara malik olacaqdır”.

Heydər Əliyev Brüsseldə bütün görüşlərində və çıxışlarında diqqəti Azərbaycan ərazisinin 20 faizinin Ermənistan tərəfindən işğal olunduğuna yönəldir, həmçinin ozamankı Minsk qrupunun fəaliyyətsizliyini tənqid edirdi. Məsələn, “Sülh naminə tərəfdaşlıq” çərçivə sənədinin imzalanma mərasimində bəyanatla çıxış edən Ulu Öndər dedi ki, Azərbaycan Respublikası Minsk qrupunun fəaliyyətini dəstəkləmək üçün öz tərəfindən hər şey edir, ona mümkün olan bütün şəraiti yaradır: “Lakin nəzərə çarpdırmaq istəyirəm ki, hər dəfə Minsk qrupu toplaşdıqda dünya Ermənistan tərəfindən hərbi əməliyyatların daha da gücləndirilməsinin, yeni-yeni Azərbaycan ərazilərinin işğal edilməsinin şahidi olur. ATƏM-in (hazırkı ATƏT - red.) indiki sədrinin 1993-cü ilin oktyabrında bölgəyə səfəri və ya Minsk qrupunun bu ilin aprelində Praqada müşavirəsi keçirilən zaman və başqa vaxtlarda məhz belə olmuşdur. Minsk qrupunun nümayəndə heyəti aprelin 26-dan mayın 2-dək bölgədə idi. Biz ona hər cür kömək göstərdik. Əgər Minsk qrupunda təmsil olunmuş ölkələrin hamısı qanlı müharibəyə bacardıqca tez bir vaxtda son qoymaq və sülhün bərpasına başlamaq üçün möhkəm iradə ilə çıxış edərsə, mən əminəm ki, müvəffəqiyyət təmin olunar”.

Məhz Ulu Öndərin gərgin səyləri nəticəsində 1994-cü il mayın 12-də atəşkəs sazişi imzalandı. Beləliklə, müstəqilliyimizin ilk illərində ölkə iqtisadiyyatına sərmayə yatırmaqda maraqlı olan dövlətlərin, şirkətlərin tərəddüdlərinə son qoyuldu.

Heydər Əliyev Azərbaycanda milli hərbi kadrların yetişdirilməsinə, gələcəyin zabitlərinin təhsilinə, onların vətənpərvərlik ruhunda tərbiyəsinə xüsusi önəm verirdi. Mayın 9-da Bakı Ümumqoşun Komandirləri Məktəbində Həzi Aslanovun abidəsinin açılış mərasimində çıxış edərkən hərbi peşənin xüsusiyyətləri, əsgər və zabitlərimizi necə görmək istədiyi barədə fikirlərini söylədi.

Sitat: Hərbi peşə, zabitlik peşəsi, Vətəni müdafiə işi müqəddəsdir. İnsan həyatda çox peşələrlə məşğul ola bilər. Amma hər bir adam özünü hərbi işə, əsgəri işə, Vətəni müdafiə etmək işinə həsr edə bilməz. Bunu yalnız Vətənini həddindən artıq sevən, xalqına sadiq olan insanlar edə bilərlər. Mən sizi məhz bu cür görmək istəyirəm. Güman edirəm ki, siz elə də olacaqsınız.

Heydər Əliyevin C.Naxçıvanski adına ixtisaslaşdırılmış hərbi məktəbdə çıxışında söylədiyi digər bir fikir də artıq günümüzün reallığıdır: “Azərbaycan Ordusunun gözəl gələcəyi var, bu ordu daha da möhkəmlənəcək, yüksələcək, müstəqil Azərbaycanın suverenliyini, ərazi bütövlüyünü qoruyacaq, respublikanın hərbi qüdrətini yüksəklərə qaldıracaqdır”.

1994-cü ilin mayı, həmçinin Bakıda dünyanın 20 ölkəsindən 180-dək şirkətin təmsil olunduğu “Xəzərneftqaz” I Beynəlxalq Sərginin açılışı ilə əlamətdar oldu. Sərginin açılış mərasimindəki nitqində Azərbaycanın neft sənayesinin tarixinə nəzər salan, neftçilərin əməyini yüksək qiymətləndirən Heydər Əliyev ölkəmizin neft sənayesinin inkişafında yeni mərhələ açıldığını bildirdi. Qeyd etdi ki, bu mərhələ Xəzər dənizində neft və qaz yataqlarının işlənməsində Qərbin iri neft şirkətlərinin fəal iştirakı ilə bağlıdır.

Bir müddət sonra - 1994-cü ilin sentyabrında imzalanan “Əsrin müqaviləsi” Ulu Öndərin uzaqgörənliyinin və yeni neft strategiyasının uğurunun əyani təsdiqi oldu.