Xalqla dialoqun unikal forması ŞƏRH
Bakı, 12 yanvar, AZƏRTAC
Prezident İlham Əliyev yanvarın 10-da yerli televiziya kanallarına geniş müsahibəsində bir çox məsələlərə aydınlıq gətirdi. Müsahibədə Qarabağ və Şərqi Zəngəzurda həyata keçirilən infrastruktur layihələri, yenidənqurma və bərpa işləri, keçmiş məcburi köçkünlərin qayıdışına dair ictimaiyyətə dolğun məlumatlar verildi. Üç saata yaxın davam edən və 20-dək istiqamət üzrə sualların cavablandırıldığı müsahibədə dövlətimizin başçısı media vasitəsilə problemlər və uğurlar barədə səmimi çıxışlar etdi. Bu müsahibə Azərbaycan Prezidentinin xalqla dialoqunun unikal formasıdır.
Bu sözləri AZƏRTAC-a açıqlamasında politoloq Ramiz Alıyev söyləyib.
Onun sözlərinə görə, dövlətimizin başçısının yerli televiziya kanallarına müsahibəsi onun mediaya tam açıq olmasından xəbər verir. Prezident İlham Əliyevin hər yeni ilin ilk aylarında yerli televiziya kanallarına müsahibə verməsi ənənə halını alıb. Bu müsahibələrdə ötən ildə görülən işlər, qazanılan uğurlar və üzə çıxan problemlər geniş təhlil olunur, növbəti il üçün hədəflər və onlara nail olmaq üçün mexanizmlər açıqlanır. Hər bir ölkə prezidentinin fəaliyyətində media ilə işləmək, ən çətin suallara belə cavab vermək bacarığı xüsusi rol oynayır. Dünya miqyasında mətbuatla dost münasibətdə olan prezidentlər barmaqla sayılacaq qədər azdır. Əksər siyasətçilər açıq suallardan qaçır, xalqa hesabat verməmək üçün müxtəlif yollara əl atırlar. Azərbaycan Prezidenti isə təkcə ölkə daxilində deyil, hətta xarici ölkələrdə səfərlərdə olarkən mətbuatla açıq münasibətlər qurur, bütün suallara cavab verir. Hələ Vətən müharibəsi zamanı da xalqla birbaşa dialoq aparan Prezident İlham Əliyev beynəlxalq media nümayəndələrinə mütəmadi şəkildə müsahibələr verirdi. O, hətta Azərbaycana qarşı qərəzli münasibətdə olan beynəlxalq media orqanlarının nümayəndələrinin suallarını da cavablandırırdı. İkinci Qarabağ müharibəsi zamanı dövlətimizin başçısı 30-dan çox xarici mətbuata müsahibə verdi. Dünyanın ən demokratik ölkələrində belə dövlət başçıları Azərbaycan Prezidenti qədər mətbuata açıq deyil.
Politoloq qeyd edib ki, dövlətimizin başçısı müsahibəsində həm ötən dövr ərzində Qarabağ və Şərqi Zəngəzurda görülən işlər, Azərbaycan-Ermənistan arasında aparılmış danışıqların konturları barədə ictimaiyyətə məlumat verdi, həm də qarşıdakı müddətdə atılacaq addımların istiqamətlərini göstərdi: “Müsahibədə nəinki sıravi vətəndaşların, hətta uzun müddət siyasi proseslərin içərisində olan politoloqların, jurnalistlərin belə bilmədikləri, bu günə qədər ictimaiyyətə bəlli olmayan məlumatlar açıqlandı. Şəxsən mən bir çox yeniliklərə tanış oldum. Bu yeniliklər növbəti prosesləri proqnozlaşdırmaq, danışıqların səmtini müəyyənləşdirmək baxımında bizə xeyli ipucu verdi. Onun 2024-cü ildə daha 5 şəhərə (Şuşa, Xankəndi, Xocalı, Kəlbəcər, Cəbrayıl) keçmiş məcburi köçkünlərin qayıdacağı müjdəsini verməsi və işğaldan azad olunmuş ərazilərə insanların qayıdışının yüksək səviyyədə təmini üçün aparılan tikinti və bərpa işləri, infrastruktur layihələri barədə bir çox məlumatları bölüşməsi Prezident və xalq arasında media vasitəsilə əlaqələrin nə qədər faydalı olduğunu göstərdi. Prezident İlham Əliyevin “Müasir tariximizin yeni dövrü məhz sentyabrın 20-dən sonra başlayır” fikri yeni milli ideoloji hədəflərin müəyyənləşdirilməsini zəruri edir. Artıq ölkəmizin həyatında yeni dövr başlayıb. Biz yeni dövrə köhnə hədəflərlə gedə bilmərik”.
R.Alıyev vurğulayıb ki, müsahibədə Prezident tərəfindən cavablandırılan 20-dək istiqamətin hər biri üzrə saatlarla danışmaq, təhlillər aparmaq mümkündür: “Düşünürəm ki, ölkənin ictimai-siyasi, iqtisadi həyatı ilə maraqlanan hər bir kəs dövlətimizin başçısının müsahibəsi vasitəsilə bir sıra məsələləri özü üçün aydınlaşdırdı, suallara cavab tapdı. Bizim 2024-cü il üçün taktiki hədəflərimiz aydındır. Hər şey riyazi dəqiqliklə hesablanıb. Ölkəmizdə hökm sürən siyasi sabitlik, iqtisadi inkişaf, sabaha olan ümid, inam və sağlam işgüzar mühit dövlət səviyyəsində hədəflərin düzgün müəyyənləşdirilməsindən qaynaqlanır”.
Bölmənin digər xəbərləri
