SİYASƏT
Xarici İşlər nazirliyinin mətbuat Mərkəzi xəbər verir
Azərbaycanın xarici işlər naziri Vilayət Quliyev iyulun 30-da İraqın vəqflər və dini işlər naziri Əbdül Munim Əhməd Salehi və onu müşayiət edən nümayəndə heyətini qəbul etmişdir.
Vilayət Quliyev ölkələrimiz arasında tarixi əlaqələrin mövcudluğunu vurğulayaraq, iqtisadi, dini, mədəni və digər sahələrdə əməkdaşlığın genişlənməsinin hər iki tərəf üçün faydalı olacağını bildirdi. Nümayəndə heyətinin Azərbaycana səfərini bu baxımdan müsbət qiymətləndirən nazir qonaqlara ölkəmizdəki ictimai-siyasi vəziyyət, Ermənistan-Azərbaycan, Dağlıq Qarabağ münaqişəsinin həlli yollarının perspektivlərindən danışdı.
Cənab Əhməd Saleh Bakıya səfərinin məqsədindən danışdı, İraqın Azərbaycandakı səfirliyinə göstərilən köməyə görə Vilayət Quliyevə təşəkkürünü bildirdi. Ermənistan-Azərbaycan münaqişəsindən söhbət açan qonaq dedi ki, onun ölkəsi Azərbaycanın ədalətli mövqeyini beynəlxalq təşkilatlarda bundan sonra da daim dəstəkləyəcəkdir. İraq-Azərbaycan əlaqələrinin daha da genişlənməsi üçün müştərək iqtisadi komissiya yaradılmasının vacibliyini bildirən cənab Əhməd Saleh Bağdadda tezliklə Azərbaycanın səfirliyinin açılmasını arzu etdiyini vurğuladı.
Vilayət Quliyev İslam Konfransı Təkilatı çərçivəsində Azərbaycanın İraqla əməkdaşlığını yüksək qiymətləndirdi, digər sahələrdə də əlaqələri inkişaf etdirməyin zəruriliyini bildirdi. Nazir bu ilin aprelində Qafqaz Müsəlmanları İdarəsinin İraqa göstərdiyi humanitar yardımın ölkələrimiz arasında mənəvi əlaqələrin inkişafına sübut olduğunu söylədi və bu ənənənin imkan daxilində gələcəkdə də davam etdiriləcəyini vurğuladı.
Tərəflər qarşılıqlı maraq doğuran bir sıra məsələlər barəsində də fikir mübadiləsi etdilər.
x x x
Vilayət Quliyev elə həmin gün Pakistan İslam Respublikasının Azərbaycandakı səfiri Məhəmməd Faiz Xosonu ölkəsinin Bakıdakı diplomatik missiyasının başçısı təyin olunması münasibətilə qəbul etmişdir.
Azərbaycanın xarici siyasət idarəsinin başçısı səfiri yeni təyinatı ilə əlaqədar təbrik edərək dedi ki, ölkələrimiz arasında münasibətlər ənənəvi dostluq xarakteri daşıyır və bu, gələcək əməkdaşlığın inkişaf perspektivlərinin yaxşı olacağına inam bəsləməyə imkan verir.
Pakistan diplomatı minnətdarlıq edərək dedi ki, o, Azərbaycanın müstəqillik qazanmasından və qısa müddətdə bütün sahələrdə böyük uğurlara nail olmasından iftixar duyur. Sonra Pakistan səfiri özünün etimadnaməsinin surətini Azərbaycan nazirinə təqdim etdi.
Ölkələrimiz arasında siyasi münasibətlərin öz başlanğıcını Azərbaycanın müstəqilliyinin Pakistan tərəfindən birincilər sırasında tanınmasından götürdüyünü xatırladan nazir Vilayət Quliyev dedi ki, respublikamızda Pakistanın bizə münasibətdə siyasətini və Ermənistan-Azərbaycan münaqişəsi məsələsində tutduğu prinsipial və ədalətli mövqeyi lazımınca qiymətləndirirlər.
Cənab Məhəmməd Faiz Ermənistan-Azərbaycan münaqişəsinin, habelə Kəşmir probleminin tezliklə sülh yolu ilə həllinə ümid bəslədiyini bildirdi. O, Azərbaycanla ikitərəfli münasibəilərin daha da inkişafına tərəfdar olduğunu söyləyərək dedi ki, Bakıdakı diplomatik fəaliyyəti dövründə ölkələrimiz arasında dostluq və həmrəyliyin inkişafı üçün əlindən gələni edəcəkdir.
Nazir Vilayət Quliyev ümidvar olduğunu bildirdi ki, gələcəkdə diskussiyalar və fikir mübadiləsi müxtəlif məsələlərdə daha geniş cəhətləri əhatə edəcəkdir.
Söhbət zamanı qarşılıqlı maraq doğuran bəzi başqa məsələlər də müzakirə olundu.