XƏSTƏXANA MİLLİ TƏHLÜKƏSİZLİK NAZİRLİYİNİN BALANSINA VERİLMİŞDİR

17.06.2006 [19:39]
Çap et
A⁺ A^-

Bakı Baş Səhiyyə İdarəsinin tabeliyində olan Badamdar qəsəbəsindəki 15 nömrəli birləşmiş şəhər xəstəxanası Nazirlər Kabinetinin qərarı ilə Milli Təhlükəsizlik Nazirliyinin (MTN) balansına verilmişdir. Səhiyyə Nazirliyinin mətbuat xidmətindən AZƏRTAC-ın müxbirinə bildirmişlər ki, bu qərar tibb müəssisəsinin 2005-ci ildə səmərəsiz fəaliyyət göstərdiyinə görə və MTN əməkdaşlarına yüksək keyfiyyətli tibb xidməti təmin etmək məqsədi ilə qəbul olunmuşdur. Belə ki, ötən il xəstəxananın terapiya bölməsində hər bir çarpayı 27 gün (7,9 faiz), ginekologiya şöbəsində 28 gün (8,2 faiz) tutulmuşdur ki, bu da normativin 17 faizinə bərabərdir.

Hazırda qəsəbənin sakinlərinə ambulator-poliklinika xidmətlərini buradakı digər poliklinikalar göstərir, ixtisaslaşdırılmış stasionar xidmətləri isə şəhərin çoxsaylı klinika və xəstəxanalarında almaq mümkündür. Yaxın vaxtlarda qəsəbədə köməkçi təcili tibbi yardım stansiyasının istifadəyə verilməsi gözlənilir.

Bundan əlavə, Bakı şəhəri qəsəbələrinin sosial inkişafı proqramı çərçivəsində Badamdarda 25 çarpayılıq uşaq xəstəxanası və poliklinika tikiləcəkdir.