Xocalı faciəsi Meksikada ehtiramla anılmışdır
Bakı, 25 fevral (AZƏRTAC). Azərbaycanın Meksikadakı səfirliyinin təşkilatçılığı ilə Meksika ştatının simfonik orkestri Xocalı soyqırımının 21-ci ildönümü ilə əlaqədar “Xocalıya ədalət!” beynəlxalq kampaniya çərçivəsində faciə qurbanlarının xatirəsini anma konserti təqdim etmişdir.
Anma konserti Mexiko şəhərində, Xocalı soyqırımı qurbanlarının xatirəsinə həsr edilmiş abidənin yerləşdiyi Tlakskoake-Xocalı Meydanında təşkil olunmuşdur.
Səfirliyin mətbuat xidmətindən AZƏRTAC-a bildirmişlər ki, konsertdən əvvəl çıxış edən Azərbaycanın Meksikadakı səfiri İlqar Muxtarov Xocalı soyqırımı barədə məlumat vermişdir. Səfir bildirmişdir ki, Ermənistanın Azərbaycana qarşı davam edən təcavüzü nəticəsində Xocalıda baş vermiş soyqırımı insanlıq tarixində törədilmiş ən dəhşətli faciələrdən biri olmuşdur.
Xocalı soyqırımı zamanı şəhərin mülki əhalisinə qarşı həyata keçirilmiş cinayətlərdən danışan səfir, bu soyqırımına görə məsuliyyət daşıyanların indiyədək cəzasız qaldıqlarını diqqətə çatdırmışdır. Səfir, eyni zamanda, vurğulamışdır ki, hazırda beynəlxalq ictimaiyyət tərəfindən Xocalıda baş vermiş cinayətlərin tanınması prosesinin genişlənməsi ədalətin tezliklə bərqərar olacağına böyük ümidlər yaradır.
Xocalı soyqırımı qurbanlarının xatirəsi bir dəqiqəlik sükutla yad edilmişdir.
Tədbirdə, həmçinin Xocalı soyqırımı qurbanlarının xatirəsinə həsr edilmiş abidənin yaxınlığında yerləşən XVII əsrə məxsus Konsepsion Santisima kilsəsinin baş keşişi Eduardo Lozano Xuarez çıxış etmişdir. Eduardo Lozano sülhün əleyhinə olan təcavüzləri və insanların ölümü ilə nəticələnən bütün cinayətləri pisləyərək Xocalıda törədilmiş soyqırımının da məhz belə bir təcavüzkarlığın nəticəsi olduğunu söyləmişdir.
Eduardo Lozano Azərbaycan Hökumətinin dəstəyi ilə Tlakskoake-Xocalı Meydanının təmir və bərpasını, habelə kilsə zənglərinin ianə edilməsini, meydanda ucalan Xocalı qurbanlarına həsr edilmiş abidənin sülh və Tanrı məhəbbətinin göstəricisi olduğunu söyləmişdir.
Meydanda təqdim olunan klassik dünya və Azərbaycan bəstəkarlarının əsərlərindən ibarət konsert proqramında, həmçinin xalqımızın dahi bəstəkarı Qara Qarayevin kompozisiyaları da ifa edilmişdir.
Sonda Xocalı soyqırımı qurbanlarının xatirəsinin yad edilməsinin rəmzi kimi havaya “Xocalıya ədalət!” yazılmış şarlar buraxılmışdır.
Tədbir iştirakçılarına “Xocalıya ədalət!” beynəlxalq kampaniyası çərçivəsində Azərbaycanın Meksikadakı səfirliyi tərəfindən ispan dilində nəşr etdirilmiş broşürlər, jurnallar, “Xocalı soyqırımı” adlı sənədli film, üzərinə “Xocalıya ədalət!” yazılmış köynəklər və matəm döş nişanları paylanılmışdır.
Anma konsertində Türkiyə və Gürcüstanın Meksikadakı səfirləri, habelə Meksikada akkreditə edilmiş diplomatik nümayəndəliklərin üzvləri, burada yaşayan həmvətənlərimiz və Mexiko şəhərinin sakinləri iştirak etmişlər.
Bölmənin digər xəbərləri
