Xocalı faciəsi TRT-nin kanalları ilə dünya ictimaiyyətinə çatdırılır
Bakı, 25 fevral (AZƏRTAC). Türkiyə Radio Televiziya Qurumunun (TRT) kanalları son dörd gündə Xocalı soyqırımı ilə bağlı proqramlar yayımlamış və hazırda dünya ictimaiyyətini faciə ilə bağlı məlumatlandırmağa davam edir.
TRT-nin Bakı Nümayəndəliyindən AZƏRTAC-a bildirmişlər ki, TRT-1, “TRT Haber”, “TRT Türk”, “TRT Avaz” və TRT-nin ərəbcə kanalında Xocalı həqiqətləri izləyicilərə çatdırılır. Bu sırada TRT-nin ərəbcə kanalında Bakıdan canlı yayımda ərəb dünyası Xocalı soyqırımı haqqında məlumatlandırılmışdır.
“TRT” teleşirkətinin Bakı təmsilçisi Yüksəl Dəyərcan bildirmişdir ki, fevralın 26-da TRT-nin beş kanalında Xocalı faciəsi ilə bağlı özəl proqramlar yayımlanacaqdır. Qeyd edilmişdir ki, “TRT Avaz” gün ərzində faciənin ildönümünü diqqətdə saxlayacaqdır. Verilişlərdə Azərbaycandan ekspertlər və Milli Məclisin deputatları iştirak edəcəklər. Həmin gün Azərbaycan Xarici İşlər Nazirliyinin sözçüsü Elman Abdullayev “TRT Haber”in qonağı olacaqdır.
Həmçinin fevralın 26-da TRT Bakı təmsilçiliyinin hazırladığı “Hayellerim vardı” və “Hocalı yaşıyor” adlı sənədli filmlər nümayiş etdiriləcəkdir.
Bölmənin digər xəbərləri
