Xocalı soyqırımı ən dəhşətli terror hadisələrindən biri kimi tarixə düşüb
Bakı, 25 fevral, AZƏRTAC
Fevralın 25-də AMEA-nın Memarlıq və İncəsənət İnstitutunda Xocalı faciəsinin 27 illiyinə həsr olunmuş anım tədbiri keçirilib.
İnstitutdan AZƏRTAC-a bildirilib ki, mərasim iştirakçıları erməni təcavüzkarları tərəfindən Xocalıda amansızlıqla qətlə yetirilmiş günahsız insanların xatirəsini bir dəqiqəlik sükutla yad ediblər. İnstitutun direktoru, AMEA-nın müxbir üzvü, professor Ərtegin Salamzadə deyib ki, Xocalı soyqırımı öz vəhşiliyinə və qəddarlığına görə insanlığa qarşı ən dəhşətli kütləvi terror hadisələrindən biri kimi tarixə düşüb. Dövlətimiz tərəfindən aparılan məqsədyönlü siyasətin nəticəsi kimi dünyanın bir sıra ölkələrində Xocalı faciəsinə soyqırımı kimi qiymət verilib. Azərbaycan xalqı Xocalı faciəsi qurbanlarını heç vaxt unutmayacaq, onların xatirəsini həmişə yaşadacaq.
Tədbirdə institutun ümumi işlər üzrə direktor müavini, kulturologiya üzrə fəlsəfə doktoru, dosent Namiq Abbasov, teatr, kino və televiziya şöbəsinin müdiri, sənətşünaslıq üzrə fəlsəfə doktoru, dosent Vidadi Qafarov, görkəmli kinorejissor Ayaz Salayev 27 il əvvəl Xocalıda ermənilər tərəfindən dinc əhaliyə qarşı törədilən qırğından danışıblar.
Mərasimdə Xocalı soyqırımı ilə bağlı film nümayiş olunub.
Bölmənin digər xəbərləri
