Xocalı soyqırımı XX əsrin ən böyük faciəsidir
Tərtər, 25 fevral, Tahir Ağaməmmədov, AZƏRTAC
1992-ci il fevralın 25-dən 26-na keçən gecə Ermənistan silahlı qüvvələri keçmiş SSRİ-nin Xankəndi şəhərində yerləşən 366-cı motoatıcı alayının zirehli texnikası və hərbi heyətinin köməyi ilə Xocalı şəhərində yüzlərlə günahsız dinc sakinə, o cümlədən qadın, qoca və uşaqlara qarşı ən qəddar cinayətlər törədiblər. XX əsrin ən böyük faciəsi olan Xocalı soyqırımı tarixin yaddaşlardan heç vaxt silinməyən Xatın, Xolokost, Sonqmi, Ruanda və Srebrenitsa kimi dəhşətli faciələrdən heç də geri qalmır.
AZƏRTAC-ın bölgə müxbiri xəbər verir ki, bu fikirlər Xocalı faciəsinin 27-ci ildönümü münasibətilə Tərtər şəhərindəki Mədəniyyət Mərkəzində keçirilən tədbirdə səsləndirilib. Tədbir iştirakçıları əvvəlcə Xocalı soyqırımına həsr olunmuş məktəblilərin əl işlərindən ibarət rəsm sərgisi ilə tanış olublar.
Rayon ictimaiyyətinin nümayəndələri, Qarabağ müharibəsi veteranları, gənclər və ağsaqqallar və rayonda məskunlaşan Xocalıdan olan məcburi köçkün və şəhid ailələrinin nümayəndələrinin iştirak etdiyi tədbirdə Xocalı faciəsi qurbanlarının xatirəsi bir dəqiqəlik sükutla yad edilib.
Tərtər Rayon İcra Hakimiyyətinin başçısı Müstəqim Məmmədov çıxış edərək, erməni silahlı qüvvələri tərəfindən Xocalı şəhərində törədilən qırğından, dinc əhaliyə amansız divan tutulmasından danışıb. Bildirilib ki, Ermənistan silahlı qüvvələrinin mühasirəsində qalmış şəhər sakinlərindən 613-ü, o cümlədən 106 qadın, 63 uşaq və 70 qoca öldürülüb, 487 dinc sakin ağır yaralanıb, 1275 nəfər isə girov götürülüb.
Diqqətə çatdırılıb ki, Хоcalı soyqırımı özünün siyasi-hüquqi qiymətini yalnız ümummilli lider Heydər Əliyev hakimiyyətə qayıtdıqdan sonra alıb və bundan sonra Azərbaycan reallıqlarının beynəlxalq ictimaiyyətə çatdırılması üzrə məqsədyönlü tədbirlər görülməyə başlanılıb. Məhz Ulu Öndərin təşəbbüsü ilə 1994-cü ildə Azərbaycan Milli Məclisi fevralın 26-sını Xocalı Soyqırımı Günü elan edib. Bu gün dünya ictimaiyyətinin Xocalı həqiqətləri barədə məlumatlandırılması istiqamətində işlər davam etdirilir. Prezident İlham Əliyevin apardığı ardıcıl və məqsədyönlü siyasətin nəticəsidir ki, artıq beynəlxalq təşkilatlar, aparıcı dövlətlər münaqişənin kökləri, səbəbləri və nəticələri barədə daha geniş məlumatlandırılır. Bu gün Xocalı faciəsi dünyanın ən böyük dövlətlərinin parlamentlərində müzakirəyə çıxarılır, həmin gün yaşanan hadisələr ictimaiyyətə açıqlanır.
Qeyd olunub ki, Xocalı faciəsinin canlı şahidi olmuş 18 ailə Tərtərin 7 kəndində məskunlaşıb. Hər bir xocalılıya rayonda daim böyük diqqət və qayğı göstərilir.
Rayon polis şöbəsinin rəisi Elçin Qasımov, prokuror Şıxəli Alməmmədov, Gülabatlı kənd tam orta məktəbin direktoru Asif Alıkişiyev, “Xocalı əsrin faciəsidir” mövzusunda rayon məktəbliləri arasında keçirilən inşa-yazı müsabiqəsinin qalibi, Dəmirçilər kənd tam orta məktəbin şagirdi Günay İbrahimli çıxış edərək Xocalı faciəsinin dəhşətlərindən danışıb, xalqımızın tarixində ən qanlı hadisələrdən biri olan, erməni silahlı dəstələri tərəfindən soydaşlarımıza qarşı törədilən bu soyqırımı zamanı dinc əhalinin xüsusi qəddarlıqla qətlə yetirildiyini, əsir götürülən insanların isə dəhşətli işgəncələrə, zülm və təhqirlərə məruz qaldıqlarını diqqətə çatdırıblar.
Anım mərasimində “Xocalı əsrin faciəsidir” mövzusunda rayon məktəbliləri arasında keçirilən inşa-yazı müsabiqəsinin qaliblərinə diplom və fəxri fərmanlar verilib, Xocalı soyqırımının dəhşətlərini əks etdirən ədəbi-bədii kompozisiya nümayiş olunub.
Tədbirdən sonra rayon icra hakimiyyətinin başçısı Müstəqim Məmmədov rayonda məskunlaşmış Xocalı sakinləri ilə görüşərək, onların problemləri ilə maraqlanıb. Xocalıdan olan ailələrə ərzaq yardımı verilib.
Bölmənin digər xəbərləri
