Xorvatiyada Zəfər Günü münasibətilə tədbir keçirilib
Zaqreb, 9 noyabr, AZƏRTAC
Xorvatiyada Azərbaycanın Zəfər Günü münasibətilə tədbir keçirilib.
Tədbirdə Xorvatiya Respublikasının dövlət qurumlarının rəsmiləri, Xorvatiya Parlamentinin üzviləri, bu ölkədə akkreditə olunan diplomatik korpusun rəhbərləri və beynəlxalq təşkilatların nümayəndələri, ictimai təşkilatların rəhbərləri, elm, mədəniyyət və incəsənət xadimləri, Xorvatiyada yaşayan azərbaycanlılar, həmçinin KİV nümayəndələri iştirak ediblər.
Tədbir Azərbaycan və Xorvatiya Dövlət Himnləri ilə başlayıb, daha sonra Vətən müharibəsindən bəhs edən videoçarxlar nümayiş olunub.
Tədbirdə çıxış edən Azərbaycanın Xorvatiyadakı səfiri Anar İmanov, tədbir iştirakçılarını Ermənistanın ölkəmizə qarşı həyata keçirdiyi işğalçılıq siyasəti və onun ağır nəticələri, işğal nəticəsində Azərbaycanın şəhər və kəndlərinin tamamilə viran edilməsi, Vətən müharibəsinin başlanması, Ermənistan tərəfindən Azərbaycanın müxtəlif iri şəhər və yaşayış məntəqələrinin bombalanması, Müzəffər Ali Baş Komandanın rəhbərliyi ilə qüdrətli Azərbaycan Ordusunun əldə etdiyi Zəfər barədə məlumatlandırılıb.
A.İmanov Azərbaycan Ordusunun 44 günlük Vətən müharibəsi nəticəsində ölkəmizin torpaqlarını işğaldan azad edərək ərazi bütövlüyünü təmin etdiyini, 8 noyabr tarixində Ordumuzun həyata keçirdiyi unikal hərbi əməliyyat nəticəsində Azərbaycan mədəniyyətinin paytaxtı qədim Şuşa şəhərinin işğaldan azad edildiyini, müharibədə məğlub olan Ermənistanın 10 noyabr tarixində kapitulyasiya aktını imzalamağa məcbur olduğunu vurğulayıb. Səfir, 44 günlük Vətən müharibəsi nəticəsində 30 illik erməni işğalına son qoyularaq torpaqlarımızın azad edildiyini, bu ilin 19-20 sentyabr tarixlərində keçirilmiş lokal xarakterli antiterror tədbirləri nəticəsində isə ölkəmizin bütün ərazisində dövlət suverenliyinin və konstitusiya quruluşunun bərpa edildiyini qeyd edib.
Diplomat Azərbaycan Prezidenti İlham Əliyevin Sərəncamı ilə ölkəmizdə hər il 8 Noyabr tarixinin Zəfər Günü kimi qeyd edildiyini tədbir iştirakçılarının diqqətinə çatdırıb.
Tədbirdə çıxış edən Xorvatiyanın xarici və Avropa işləri nazirinin müavini Frano Matuşiç, Azərbaycan və Xorvatiyanın dost ölkələr olduğunu, ölkələrimizin oxşar tarixi yol keçdiyini, hər iki xalqın müstəqillik və ərazi bütövlüyü uğrunda mübarizə apardığını, ağır müharibələrdən keçərək güclü müstəqil dövlətə çevrildiyini bildirib. F.Matuşiç, ölkəsinin 90-cı illərin əvvəlində hərbi təcavüzə məruz qaldığını və separatizmlə üzləşdiyini, nəticədə ərazilərinin bir hissəsinin işğal edildiyini, aparılan Vətən müharibəsi nəticəsində itirilmiş ərazilərin yenidən nəzarət altına qaytarıldığını deyib. O, Azərbaycanın da 1991-ci ildə müstəqilliyini bərpa etdikdən sonra oxşar hadisələrlə üzləşdiyini, bu gün isə Prezident İlham Əliyevin rəhbərliyi altında, regionun və dünyanın sürətlə inkişaf edən ölkələrindən birinə çevrildiyini, beynəlxalq nüfuzunu gücləndirərək hərtərəfli inkişaf yolunda inamla addımladığını vurğulayıb.
F.Matuşiç ölkələrimiz arasında uğurlu əməkdaşlıqdan danışaraq, Azərbaycanın Xorvatiya üçün Cənubi Qafqaz bölgəsində əsas tərəfdaşı olduğunu qeyd edib. O, Xorvatiya Respublikasının Baş naziri Andrej Plenkoviçin 6 noyabr tarixində Azərbaycana həyata keçirilən səfərinin uğurlu olduğunu, ölkələrimiz arasında ikitərəfli əlaqələrin inkişafına güclü təkan verdiyini diqqətə çatdırıb.
F. Matuşiç Xorvatiyanın minatəmizləmə sahəsində böyük təcrübəyə malik olduğunu, 30 ildən artıqdır ki, ölkə ərazisində minaların təmizlənməsi ilə məşğul olduqlarını, bu sahədə Azərbaycanla mövcud əməkdaşlığı daha da dərinləşdirmək məqsədilə təcrübələri ilə bölüşməyə hazır olduqlarını bildirib.
Tədbir daha sonra ziyafət ilə davam edib.
AZƏRTAC-ın xüsusi müxbiri
Zaqreb
Bölmənin digər xəbərləri
