“YALTA AVROPA STRATEGİYASI” SAMMİTİ BAŞA ÇATMIŞDIR
İki gün davam etmiş sammitdə dünyanın 20 ölkəsindən 160-dan çox siyasətçi, ictimai xadim, biznesmen, diplomat və jurnalist iştirak etmişdir.
Tanınmış siyasətçiləri, biznes və ictimai rəy sahəsində liderləri və jurnalistləri öz sıralarında birləşdirən beynəlxalq müstəqil “Yalta Avropa strategiyası” təşkilatı Ukraynada islahatlar keçirilməsinə və onun Avropa İttifaqına daxil olmasına kömək məqsədilə yaradılmışdır.
Beynəlxalq Valyuta Fondunun icraçı direktoru Domenik Stross-Kan sammitdə məruzə ilə çıxış etmişdir. Sualları cavablandırarkən icraçı direktor demişdir ki, inflyasiyaya qarşı mübarizənin zəif olması həm Ukrayna, həm də bütün Avropa ölkələri üçün ciddi nəticələr doğura bilər.
Gürcüstan Prezidenti Mixail Saakaşvili sammitdəki çıxışında demişdir ki, Gürcüstan Rusiya ilə qarşıdurmada maraqlı deyildir və yaxşı, konstruktiv münasibətlərin tərəfdarıdır.
Britaniyalı siyasətçi və ictimai xadim, 1997-2007-ci illərdə Böyük Britaniyanın Baş naziri vəzifəsində çalışmış Toni Bleyr sammitin qonağı kimi çıxışında qeyd etmişdir ki, o, Uinston Çorçildən sonra Yaltaya gəlmiş ilk Britaniyalı siyasətçidir. T.Bleyr bildirmişdir ki, Ukraynanın gələcəyi Avropa İttifaqı ilə bağlı olmalıdır.
Bölmənin digər xəbərləri
