YAP Binəqədi Rayon Təşkilatı yaradılmasının 33-cü ildönümünü qeyd edir VİDEO
Bakı, 6 mart, AZƏRTAC
Martın 6-da Yeni Azərbaycan Partiyası (YAP) Binəqədi Rayon Təşkilatının yaradılmasının 33-cü ildönümünə həsr olunmuş “Heydər Əliyev ideyalarından güc alan 33 il: Bir qərinəlik yol” adlı tədbir və 8 Mart - Beynəlxalq Qadınlar Günü münasibətilə şənlik keçirilib.
AZƏRTAC xəbər verir ki, tədbirdən öncə YAP Binəqədi Rayon Təşkilatının inzibati binası önündə Ulu Öndər Heydər Əliyevin abidəsi ziyarət olunub.
Tədbirdə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Binəqədi Rayon İcra Hakimiyyətinin başçısı Elxan Allahverdiyev çıxışında Prezident İlham Əliyevin rəhbərliyi ilə Ümummilli Lider Heydər Əliyev ideyalarının uğurla davam etdirilməsi nəticəsində Azərbaycanın mühüm uğurlar qazandığını diqqətə çatdırıb. O, dövlətimizin hərtərəfli inkişafı və xalqımızın tərəqqisi naminə həyata keçirilən islahatların ölkəmizin daha böyük və əsaslı uğurlarına zəmin yaratdığını bildirib.
YAP Binəqədi Rayon Təşkilatının sədri Vüsar İsmayılov YAP-ın Azərbaycanın siyasi həyatında əvəzsiz rolundan danışaraq, partiyanın yalnız ölkəmizdə deyil, Qafqazda, hətta bütün dünyada yüksək nüfuza malik olduğunu qeyd edib. O, partiyanın sosial bazasının daha da möhkəmlənməsinin Ulu Öndər Heydər Əliyev ideyalarına etimadın və dövlətimizin başçısı, Yeni Azərbaycan Partiyasının Sədri İlham Əliyevin siyasətinə dəstəyin bariz nümunəsi olduğunu söyləyib. Sədr, həmçinin rayon təşkilatının fəaliyyətinə nəzər salıb. Bildirib ki, rayon təşkilatı həyata keçirdiyi tədbirlər, gördüyü işlərlə qarşısında daha böyük uğurları hədəfləyib.
Milli Məclisin deputatı, YAP İdarə Heyətinin üzvü Eldar İbrahimov çıxışında qeyd edib ki, bu gün sürətli inkişaf edən müstəqil ölkəmizi uğurlu inkişafa aparan yolda hər bir Azərbaycan vətəndaşı Prezident İlham Əliyevin siyasi kursunu dəstəkləyir. Öz əməlində Ümummilli Liderimiz Heydər Əliyev prinsiplərini yaşadan Yeni Azərbaycan Partiyasının seçdiyi əsas hədəflər – qüdrətli və zəngin Azərbaycan, ərazi bütövlüyü, siyasi sabitlik, güclü iqtisadiyyat, davamlı inkişaf, ədalətli cəmiyyət və layiqli həyatdır. Bu prinsiplər dövlətimizin başçısının rəhbərliyi ilə ölkəmizdə aparılan siyasi xəttin əsas hissəsini və prioritet istiqamətini təşkil edir.
Yeni Azərbaycan Partiyasının Mərkəzi Aparatının şöbə müdirinin müavini Rafael Gülməmmədov çıxışında partiyanın təsis olunmasının tarixindən bəhs edib. O, Ümummilli Lider Heydər Əliyevin uzaqgörən siyasəti və Prezident İlham Əliyevin siyasi strategiyası nəticəsində bu gün ölkəmizin çoxsaylı uğurlar qazanmasında Yeni Azərbaycan Partiyasının da əvəzsiz rolu olduğunu söyləyib. Bu gün Azərbaycanın dünyada söz sahibi bir ölkə olduğunu, bütün sahələr üzrə dinamik və məqsədyönlü uğurlara imza atdığını qeyd edərək bütün bunları iqtidar-xalq birliyinin, həmrəyliyinin məntiqi nəticəsi adlandırıb.
Minatəmizləmə Agentliyi İdarə Heyətinin sədri Vüqar Süleymanov çıxışında qeyd edib ki, YAP öz siyasi xətti və fəaliyyəti ilə xalqın partiyasına çevrilib. O vurğulayıb ki, Ümummilli Lider Heydər Əliyevin zəngin irsi əsasında və Prezident İlham Əliyevin rəhbərliyi ilə dövlətimizin qüdrəti, beynəlxalq nüfuzu daha da artmaqdadır. Bu gün Ümummilli Liderin ideyalarını uğurla davam etdirən Prezident İlham Əliyevin rəhbərlik etdiyi YAP böyük gücə çevrilib, onun 800 minə yaxın üzvü var. Bu üzvlərin böyük əksəriyyəti gənclərdir ki, onlar da Azərbaycanın tarixi Zəfərinin qazanılmasında müstəsna rol oynadılar.
Natiqlər xanımları da 8 Mart - Beynəlxalq Qadınlar Günü münasibətilə təbrik edərək, onlara uğurlar arzulayıblar.
Çıxışlardan sonra rayonun ictimai-siyasi həyatında səmərəli fəaliyyətinə görə fərqlənən bir qrup fəal “Fəxri fərman”la təltif olunub. Sonra partiya sıralarına yeni üzv qəbul edilən şəxslərə üzvlük vəsiqələri təqdim edilib.
Tədbir bədii hissə ilə davam etdirilib.
Sonda Yeni Azərbaycan Partiyasının himni səsləndirilib.
Bölmənin digər xəbərləri
