YAP ŞƏKİ TƏŞKİLATI HESABAT VERMİŞDİR
İştirakçılar əvvəlcə ulu öndərin şəhər icra hakimiyyəti binasının qarşısındakı parkda ucaldılmış abidəsini ziyarət edərək əklil və gül-çiçək qoymuşlar.
Şəki Dövlət Dram Teatrının salonuna toplaşanlar ümummilli liderimizin əziz xatirəsini birdəqiqəlik sükutla yad etmişlər.
Konfransda YAP Şəki təşkilatının sədri Həsən Həsənovun təşkilatın V konfransdan ötən dövr ərzindəki fəaliyyəti ilə bağlı hesabat məruzəsi dinlənilmişdir. Məruzədə partiyanın yaranma tarixinə bir daha geniş nəzər salınmış, məhz ulu öndərin xalqın tələbi ilə yenidən hakimiyyətə qayıdışı və Yeni Azərbaycan Partiyasının iqtidar partiyasına çevrilməsinin müstəqilliyimizin qorunmasını, dövlətçiliyimizin möhkəmləndirilməsini, ölkənin böhrandan çıxması və tənəzzüldən tərəqqiyə doğru irəliləməsini təmin edən əsas amil olduğu xüsusi vurğulanmışdır.
Son illər Azərbaycanın istər iqtisadi, istərsə də beynəlxalq aləmdə qazandığı yüksək uğurları konkret faktlarla xatırladan məruzəçi, bu uğurların əldə edilməsində Yeni Azərbaycan Partiyasının xüsusi xidmətlərini, onun ən öncül təşkilatlarından olan Şəki təşkilatının töhfəsini vurğulamışdır. Bildirilmişdir ki, 85 ərazi ilk təşkilatını özündə birləşdirən Şəki təşkilatının hazırda 7587 üzvü vardır. Üzvlərin 46,2 faizi qadın, 27 faizi isə gənclərdir. Əvvəlki konfransdan keçən müddət ərzində partiya sıralarına 1144 nəfər qəbul olunmuşdur.
Daha sonra məruzəçi 1993-cü ilin martında fəaliyyətə başlayan Şəki təşkilatının indiyədək keçdiyi yoldan danışmış, Heydər Əliyevin ideyalarının və nəzəri irsinin təbliğinə əhəmiyyətli töhfələr verdiyini bildirmişdir. Məruzədə bəzi ərazi ilk təşkilatlarının fəaliyyətindəki nöqsanlardan da bəhs edilmişdir.
Şəki şəhəri İcra hakimiyyətinin başçısı Nazim İbrahimov, YAP Siyasi şurasının üzvü, Milli Məclisin deputatı Yaqub Mahmudov, Milli Məclisin deputatı Məjlum Şükürov və YAP İdarə heyətinin üzvü Ramiz Mirzəyev çıxış edərək, konfransın işinə uğurlar diləmiş, Yeni Azərbaycan Partiyasının ölkəmizin ən nüfuzlu siyasi qüvvəsinə və xalqın partiyasına çevrilməsində onun yaradıcısı, ulu öndərimiz Heydər Əliyevin tarixi xidmətlərini vurğulamışlar. Bildirilmişdir ki, ümummilli liderimizin siyasi xəttinin, ideyalarının bu gün partiyanın sədri, Prezident İlham Əliyev tərəfindən uğurla davam etdirilməsi xalqımızda sabaha böyük inam doğurur. Natiqlər son dövrlər Şəkinin iqtisadi, elmi və mədəni həyatında böyük dəyişikliklərin baş verdiyini, geniş tikinti-quruculuq işlərinin aparıldığını, Heydər Əliyev Fondunun vəsaiti ilə yeni məktəb binalarının tikildiyini iftixarla qeyd etmişlər.
Konfransda Həsən Həsənov yenidən YAP Şəki təşkilatının sədri seçilmişdir.
Konfrans iştirakçıları adından Yeni Azərbaycan Partiyasının sədri, Prezident İlham Əliyevə müraciət qəbul edilmişdir. Müraciət bu sözlərlə tamamlanır:
“Möhtərəm cənab Prezident!
Heydər Əliyev yolu qələbə, zəfər, yüksəliş yoludur. Bu yol müstəqil, daim çiçəklənən və tərəqqi edən, beynəlxalq aləmdə nüfuzu durmadan artan böyük Azərbaycan yoludur.
Biz bu şərəfli yolda - Heydər Əliyev yolunda cəmiyyətimizin bütün sağlam qüvvələrini Sizin ətrafınızda daha sıx birləşməyə çağırırıq”.
Bölmənin digər xəbərləri
