YAP uğurlar və qələbələr partiyası kimi yaranıb
Bakı, 20 noyabr, AZƏRTAC
Yeni Azərbaycan Partiyasının (YAP) yaradılmasının 23-cü ildönümü “SƏS” Media Holdinqin və YAP Gənclər Birliyinin birgə təşkilatçılığı ilə Nizami rayonunda da qeyd edilib.
Tədbirdə çıxış edən YAP Nizami rayon təşkilatının sədri Sədaqət Vəliyeva partiyanın yaranma tarixi və Azərbaycan dövlətçiliyinin inkişafında oynadığı rol barədə danışıb. Qeyd edib ki, ulu öndər Heydər Əliyevin adı ilə birbaşa bağlı olan YAP ölkəmizin müstəqilliyi istiqamətində böyük mübarizə yolu keçib.
Bildirilib ki, Azərbaycan xalqının ümummilli lideri Heydər Əliyevin qətiyyəti və siyasi iradəsi sayəsində 1992-ci ildə yaradılmış Yeni Azərbaycan Partiyası bu gün Cənubi Qafqazın lider partiyasına çevrilib. Ümumxalq partiyası kimi YAP-ın yaranmasının ildönümü hər il qeyd olunur. Bu il partiyanın əlamətdar tarixi günü - 23 illiyi Nizami rayon təşkilatı tərəfindən silsilə tədbirlərlə qeyd edilir.
Diqqətə çatdırılıb ki, hazırda YAP Nizami rayon təşkilatında 11 mindən artıq üzv birləşir. Üzvlərin 55 faizindən çoxunu gənclər təşkil edir. Cəmiyyətdə fəallığı ilə seçilən üzv qadınlar isə 5000 nəfərdən artıqdır.
Müasir Azərbaycanın müstəqillik tarixinin uğurlarından danışan Nizami Rayon İcra Hakimiyyətinin başçısı Arif Qasımov deyib ki, bu uğurlar YAP-ı yaradan ulu öndər Heydər Əliyevin və onun siyasi kursunun layiqli davamçısı Prezident İlham Əliyevin adı ilə bağlıdır. YAP-ın mükəmməlliyinin əsasında ilk növbədə ümummilli lider Heydər Əliyevin ideyaları dayanır. Partiyanın gücü və əzəməti onun sədri İlham Əliyevin Azərbaycanın Prezidenti kimi ölkəmizdə həyata keçirdiyi siyasətin uğurları, nailiyyətləri və qələbələridir. Partiyanın gücü, eyni zamanda, Azərbaycan xalqının YAP-a inamı, etibarı və etimadıdır. YAP 660 mindən artıq üzvü öz sıralarında birləşdirməklə ümumxalq partiyası olduğunu nümayiş etdirir.
“SƏS” Media Holdinqin rəhbəri Bəhruz Quliyev çıxışında bildirib ki, ümummilli lider Heydər Əliyevin qurub-yaratdığı müstəqil, demokratik Azərbaycan onun müəyyən etdiyi strateji xətlə inamla irəliləyir, inkişafını davam etdirir. O, Yeni Azərbaycan Partiyasının xalqı öz ətrafına birləşdirərək ümumxalq partiyasına çevrildiyini, eyni zamanda, ölkədə demokratiyanın inkişafında aparıcı qüvvə kimi özünü təsdiqlədiyini vurğulayıb. Bildirib ki, YAP-ın amalı xalqa, Vətənə, dövlətə sədaqətlə xidmət etməkdən ibarətdir. Ötən 23 il ərzində partiya bu yolda uğurlu fəaliyyət göstərib. Bu gün YAP ölkəmizin ən güclü və qüdrətli siyasi təşkilatıdır. Azərbaycanın siyasi tarixində YAP qədər güclü, əzəmətli siyasi təşkilat olmayıb. Bunun da ciddi əsasları var. Ulu öndər Heydər Əliyevin qurucusu olduğu partiya xalqımız tərəfindən daim dəstəklənir. YAP uğurlar və qələbələr partiyası kimi yaranıb. Bu uğurlar və qələbələr davamlı olacaq.
YAP Gənclər Birliyinin sədri, partiyanın Siyasi Şurasının üzvü Seymur Orucov deyib ki, bu gün Prezident İlham Əliyevin rəhbərliyi ilə Azərbaycanda əldə edilən sosial-iqtisadi uğurların əsasında ulu öndər Heydər Əliyevin siyasi kursu dayanır. Azərbaycanın dövlət siyasətində gənclərlə iş prioritet sahələrdəndir. Bu sahədə görülən tədbirlər Azərbaycanın gələcəyinin inkişafına təkan verir. Bu gün qürur hissi ilə deyə bilərik ki, dinamik inkişaf edən Azərbaycanın əldə etdiyi yüksək nailiyyətlərdə Yeni Azərbaycan Partiyasının əhəmiyyətli rolu var. Yeni Azərbaycan Partiyası ölkəmizdə gənclərin inkişafı üçün bütün imkanları yaradıb. Bu gün partiya üzvlərinin 40 faizdən artığını gənclər təşkil edir.
Bölmənin digər xəbərləri
