Yaponiya Nazirlər Kabinetinin tərkibi yenilənib
Pekin, 17 sentyabr, AZƏRTAC
Yaponiyada Nazirlər Kabinetinin yeni tərkibi formalaşıb.
AZƏRTAC Yaponiya mediasına istinadla xəbər verir ki, Baş nazir Sanae Takaiçi hökumətin tərkibində dəyişikliklər etsə də, bəzi əsas şəxslər əvvəlki vəzifələrində qalıblar.
Kabinetin 18 üzvündən səkkizi, o cümlədən Nazirlər Kabinetinin Baş katibi Minoru Kihara, maliyyə naziri Satsuki Katayama, xarici işlər naziri Toşimitsu Moteqi və müdafiə naziri Şinciro Koizumi də öz vəzifələrini icra etməyə davam edəcəklər. Baş nazir Sanae Takaiçi, həmçinin hakim Liberal Demokrat Partiyasının koalisiya tərəfdaşın olan Yaponiya İnnovasiya Partiyasının keçmiş baş katibi Hiroşi Nakatsukanı tənzimləmə islahatları üzrə dövlət naziri vəzifəsinə təyin olunub.
Qeyd edək ki, bir neçə gün əvvəldən elan edildiyi kimi sentyabrın 17-də Yaponiya hökuməti tam tərkibdə istefaya gedib. Nazirlər Kabinetinin təcili iclasında bütün üzvlər müvafiq ərizələrini təqdim ediblər və baş nazir onları qəbul edib. Bu, Sanae Takaiçinin ötən il Baş nazir vəzifəsinə gəlişindən bəri Nazirlər Kabinetində ilk dəyişiklikdir. Hökumətin tərkibinin yenilənməsi istehlak vergisinin azaldılması ilə bağlı qanun layihəsinin müzakirə olunacağı parlamentin növbədənkənar sessiyası ərəfəsində və hökumətin təhlükəsizliklə bağlı əsas sənədləri yeniləməyi planlaşdırdığı bir vaxta təsadüf edir. Yaponiyanın ilk qadın Baş naziri olan Sanae Takaiçinin hökumətinə dəstək səviyyəsi ilkin olaraq təxminən 70 faiz təşkil edirdisə, son aylarda bu rəqəm təxminən 50 faiz səviyyəsindədir.
Bölmənin digər xəbərləri
