Yaponiyanın Baş Naziri Rusiya Prezidenti ilə Vladivostokda sülh müqaviləsini müzakirə edəcək
Tokio, 3 sentyabr, AZƏRTAC
Yaponiyanın Baş Naziri Şinzo Abe Vladivostoka gözlənilən səfəri zamanı Rusiya Prezidenti Vladimir Putinlə Yaponiya-Rusiya münasibətlərini, iki ölkə arasında sülh müqaviləsini, həmçinin əsas beynəlxalq məsələləri müzakirə etmək niyyətindədir.
AZƏRTAC xəbər verir ki, bu barədə Yaponiya Nazirlər Kabinetinin Baş katibi Yoşihide Suqa sentyabrın 3-də ənənəvi mətbuat konfransı zamanı məlumat verib.
“Sentyabrın 4-dən 6-dək Baş Nazir Vladivostoka səfər edərək Şərq İqtisadi Forumuna qatılacaq. Həmin səfər çərçivəsində yüksək səviyyəli Yaponiya-Rusiya görüşünün keçirilməsi nəzərdə tutulur. Görüşdə Baş Nazir Rusiya Prezidenti ilə ikitərəfli münasibətlər, ilk növbədə, sülh müqaviləsinin imzalanması, həmçinin əsas beynəlxalq problemlərlə əlaqədar açıq fikir mübadiləsi aparmağı planlaşdırır”, - deyə Y.Suqa bildirib.
Baş katib əlavə edib ki, Yaponiyanın Baş Naziri Vladivostokda, həmçinin Hindistan və Monqolustan liderləri ilə görüşməyi də nəzərdə tutur.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
