Yengicə su anbarı 10 min hektar ərazinin suvarılmasına xidmət edəcək
Bakı, 22 aprel, AZƏRTAC
“Azərbaycanda olan su balansının 70 faizi kənardan gələn tranzit çayların hesabınadır, 30 faizi isə respublikamızın ərazisində formalaşan çaylardan əmələ gəlir. Son dövrlərdə iqlim dəyişiklikləri ilə əlaqədar Samur, Kür, Araz çaylarında həddindən artıq azalmalar özünü göstərir. Bu çayların mənbələri başqa ölkələrdədir və artıq üzərlərində çoxlu sayda su anbarları tikilib. Bu səbəbdən də respublikanın ekoloqları və bu sahədə çalışan mütəxəssislərin təklifləri əsasında respublikanın özündə formalaşan çaylar üzərindən su ehtiyatlarını əldə etmək qərarına gəlinib. Bununla əlaqədar olaraq Prezident İlham Əliyev 2020-ci ildə bu sahəyə diqqəti artıran sərəncam imzaladı. Respublikada 10 su anbarının layihələndirilməsi və tikilməsi planlaşdırıldı. Eyni zamanda ölkə ərazisində su ehtiyatlarından səmərəli istifadənin təmin edilməsi, su təsərrüfatının idarə olunmasının təkmilləşdirilməsi və bu sahədə fəaliyyətin əlaqələndirilməsi məqsədilə Komissiya yaradıldı. Yengicə su anbarının tutduğu sahə 130 hektarı əhatə edir. Anbarın yerləşdiyi ərazidə sıx meşə zonası yoxdur. Su anbarının ümumi həcmi 17.5 milyon kubmetrdir”.
AZƏRTAC xəbər verir ki, bunu Ekologiya və Təbii Sərvətlər Nazirliyinin rəsmi feysbuk səhifəsində “Ekspert saatı”nda çıxışı zamanı Azərbaycan Meliorasiya və Su Təsərrüfatı ASC-nin "Azdövsutəslayihə" institutunun direktoru Elbrus Paşayev deyib.
“Həyata keçiriləcək işlər dövlətimiz tərəfindən qabaqcadan müəyyənləşdirilib. Yengicə su anbarı Qəbələ rayonu inzibati ərazisində olacaq. Texniki quruluşuna və yerləşdiyi relyefə görə ekoloji baxımdan müəyyən mənada digər mövcud olan göllərdən daha sərfəli və səmərəli olacaq. Bu su anbarı Qəbələ rayonunun 10 min hektar ərazisinin suvarılmasına xidmət edəcək. Anbarın yerləşdiyi ərazinin ekologiyasına heç bir zərər verilməyəcək”,- deyə Dövlət Ekoloji Ekspertiza Agentliyinin sədri Mirsalam Qənbərov bildirib.
Bölmənin digər xəbərləri
