“YENİ AMERİKALILAR”IN SAYI SÜRƏTLƏ ARTIR
ABŞ-da ölkənin hüdudlarından kənarda doğulmuş və təbəələliyə götürülmə nəticəsində vətəndaşlıq almış “yeni amerikalılar”ın sayı sürətlə artır. Siyahıyaalma bürosunun məlumatına görə, 2000-ci ildə onların ümumi sayı təxminən 31,1 milyon nəfərə çatmışdır. Halbuki, 1990-cı ildə 19,8 milyon, 1980-ci ildə 14,1 milyon və 1970-ci ildə 9,6 milyon nəfər idi.
1860-1920-ci illərdə ölkə əhalisinin tərkibində onların payı 13-15 faiz arasında olmuşdur. Çünki o illər avropalıların buraya kütləvi miqrasiyası dövrü idi.
Son onilliklərdə isə Birləşmiş Ştatların əhalisi, əsasən, Latın Amerikası və Asiya ölkələrinin hesabına artır. 2000-ci ilə olan vəziyyətə görə, ABŞ-da vətəndaşlıq alanların 78,2 faizini həmin regionlardan gələnlər təşkil etmişdir. Halbuki, 30 il əvvəl onların payı cəmi 28,3 faiz idi.
Amerikaya gələnlərin birinci nəsli evdə, adətən, ana dilində danışır, ingilis dilini isə o qədər də yaxşı bilmir. Statistik məlumata görə, 2000-ci ildə ABŞ-da ingilis dili ana dili olmayan 5 və ondan yuxarı yaşlı təqribən 47 milyon vətəndaş var idi. Onların təxminən 60 faizinin ana dili ispan dilidir.
İTAR-TASS-ın verdiyi xəbərə görə, siyahıyaalma göstərmişdir ki, həmin kateqoriyadan olan ABŞ vətəndaşlarının təxminən 21,3 milyonu ingilis dilini çox da yaxşı bilmir.
Bölmənin digər xəbərləri
