SİYASƏT
Yeni Azərbaycan Partiyası cəmiyyətdə alternativsiz siyasi qüvvədir
Bakı, 20 noyabr, AZƏRTAC
Yeni Azərbaycan Partiyasının Nərimanov rayon təşkilatı və Nərimanov Rayon İcra Hakimiyyətinin birgə təşkilatçılığı ilə Yeni Azərbaycan Partiyasının (YAP) yaradılmasının 23-cü ildönümünə həsr olunan tədbir keçirilib.
Rayon icra hakimiyyətinin başçısı Abdin Fərzəliyev tədbirdə çıxış edərək xalqımızın ümummilli lideri Heydər Əliyevin ideyalarını, uğurlu daxili və xarici siyasətini inamla davam etdirən Prezident İlham Əliyevin əzmkar fəaliyyətinin Azərbaycanın onilliklərə bərabər inanılmaz bir inkişaf yolu keçməsini təmin etməklə yanaşı, gündən-günə sıraları durmadan genişlənən YAP-ın cəmiyyətdəki alternativsiz siyasi qüvvə statusunu möhkəmləndirdiyini deyib. O, YAP-ın böyük çətinliklərə sinə gərərək həyata keçirdiyi uğurlu siyasətlə xalqın partiyası imicini qazandığını, öz adında böyük bir mənanı, məqsədi birləşdirdiyini söyləyib. Ümummilli lider Heydər Əliyevin və onun layiqli davamçısı Prezident İlham Əliyevin rəhbərliyi ilə ölkə həyatının bütün sahələrində aparılan ardıcıl və köklü islahatların, yürüdülən daxili və xarici siyasətin xalqımızın rifah halının daha da yaxşılaşmasına, dövlətçiliyimizin daha da möhkəmləndirilməsinə zəmin yaratdığını diqqətə çatdırıb. İcra başçısı qədirbilən Azərbaycan xalqının ulu öndər Heydər Əliyev siyasi kursunu ölkənin davamlı inkişafının, bundan sonrakı uğurlarının, təminatlı gələcəyinin mühüm şərti olaraq dəyərləndirdiyini diqqətə çatdırıb.
YAP Nərimanov rayon təşkilatının sədri Təmraz Tağıyev partiyanın Azərbaycanın ən əsas siyasi qüvvəsi olduğunu qeyd edib, onun yaradılmasının tarixi zərurətdən doğmuş böyük hadisə olduğunu vurğulayıb. Bildirib ki, YAP-ın güclü siyasi partiya kimi özünü təsdiqləməsi dövlətimizin başçısının yüksək liderlik keyfiyyətləri, böyük səriştəsi və zəngin təcrübəsi ilə şərtlənir.
T.Tağıyev YAP Nərimanov rayon təşkilatının sıralarına böyük fəxrlə qoşulan, əksəriyyətini gənclərin təşkil etdiyi üzvlərin sayının artıq 20 min 835 nəfərə çatdığını bildirib.
Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli çıxışında YAP-ın keçdiyi çətin və şərəfli yoldan danışıb. O, ümummilli lider Heydər Əliyevin və Prezident İlham Əliyevin mətbuata, söz azadlığına olan diqqət və qayğısının nəticəsi olaraq ölkədə aparılan demokratik islahatların söz və mətbuat azadlığının daha geniş təşəkkülünə şərait yaratdığını qeyd edib.
Digər çıxış edənlər - YAP-ın rayon təşkilatının gənclər birliyinin sədr müavini Günay İmanova, Azərbaycan Kooperasiya Universitetinin tələbə gənclər təşkilatının sədri Tamerlan Əkbərov və Azərbaycan Elmi Tədqiqat Tibbi Bərpa və Təbii Amillərlə Müalicə İnstitutunun direktoru Əlişir Musayev partiyanın cəmiyyətin inkişafına yönəlmiş çoxsaylı sosial layihələr reallaşdırmasının, gəncləri dövlətçilik və milli maraqlar ətrafında sıx birləşdirməsinin onun tərəfdarlarının sayının artmasına səbəb olduğunu, əsası Ümummilli Lider tərəfindən qoyulmuş inkişaf strategiyasının bu gün Prezident İlham Əliyev tərəfindən uğurla davam etdirilməsi nəticəsində Azərbaycanın dünyanın lider dövlətinə çevrildiyini vurğulayıblar.
Tədbirin yekununda YAP-ın yaradılmasının 23-cü ildönümü münasibətilə partiyada və Nərimanov rayonunun ictimai-siyasi həyatında göstərdikləri xidmətlərə görə fərqlənən şəxslər YAP Nərimanov rayon təşkilatının fəxri fərman və hədiyyələri ilə mükafatlandırılıblar. Sonra partiya sıralarına yeni qəbul olunmuş üzvlərə vəsiqələri təqdim edilib.