YENİ AZƏRBAYCAN PARTİYASINDA GÖRÜŞ

12.12.2006 [22:27]
Çap et
A⁺ A^-

YAP mətbuat xidmətindən AZƏRTAC-a bildirmişlər ki, Yeni Azərbaycan Partiyası (YAP) sədrinin müavini-icraçı katibi, Milli Məclisin deputatı Əli Əhmədov dekabrın 12-də ABŞ-ın Milli Demokratiya İnstitutu (MDİ) Bakı ofisinin direktoru xanım Emil Şults və institutun proqram-meneceri xanım Əşli Moran ilə görüşmüşdür.

Görüşdə Milli Demokratiya İnstitutu ilə Yeni Azərbaycan Partiyası arasında qarşılıqlı əlaqələrin genişləndirilməsi və həyata keçirilən birgə layihələr barədə müzakirələr aparılmışdır.

Yeni Azərbaycan Partiyasının ölkənin ictimai-siyasi həyatında böyük təsir gücünə malik olduğunu qeyd edən xanım E.Şults partiyanın fəaliyyəti ilə daha yaxın tanışlıqdan sonra YAP-da hələ də istifadə olunmamış kifayət qədər potensialın mövcud olduğu qənaətinə gəldiyini nəzərə çatdırmışdır.

MDİ-nin təmsilçisi Yeni Azərbaycan Partiyasının rayon təşkilatlarında keçirdikləri treninqlərin onlarda böyük təəssürat yaratdığını bildirmiş və bu cür tədbirlərin digər təşkilatlarda da keçirilməsinin nəzərdə tutulduğunu qeyd etmişdir.

Ə.Əhmədov partiyanın Milli Demokratiya İnstitutu ilə əməkdaşlığından məmnunluğunu ifadə etmiş və bu əlaqələrin Yeni Azərbaycan Partiyasının gələcək fəaliyyəti üçün fayda verəcəyinə əminliyini bildirmişdir.

Görüşdə MDİ ilə Yeni Azərbaycan Partiyası arasında əlaqələrin genişləndirilməsi barədə razılıq əldə olunmuşdur.

YAP İcra katibinin müavinləri Siyavuş Novruzov və Mübariz Qurbanlı görüşdə iştirak etmişlər.