Yeni Klinikada “Çəhrayı lent” adlı seminar keçirilib
Bakı, 24 oktyabr, AZƏRTAC
Yeni Klinikada 1-31 oktyabr tarixlərini əhatə edən “Ümumdünya süd vəzi xərçəngi ilə mübarizə ayı” çərçivəsində ginekoloji xəstəliklərin profilaktikasına həsr olunan “Çəhrayı lent” adlı maarifləndirmə seminarı təşkil edilib.
Yeni Klinikadan AZƏRTAC-a verilən məlumata görə, klinikanın Reproduktiv sağlamlıq və ailə planlaması mərkəzinin təşkilatçılığı ilə keçirilən tədbirin əsas məqsədi qadın sağlamlığı ilə bağlı maarifləndirməni gücləndirmək, ginekoloji xəstəliklərin və süd vəzi xərçənginin erkən diaqnostikasının əhəmiyyətinə diqqət çəkmək, eləcə də profilaktik müayinələrin vacibliyinə dair ictimai məlumatlılığı artırmaqdır.
Tədbirdə Yeni Klinikanın direktoru Barat Yusubov, Tibbi Ərazi Bölmələrini İdarəetmə Birliyinin (TƏBİB) İctimaiyyətlə əlaqələr və kommunikasiya departamentinin rəhbəri Zamirə Ədilova, Yeni Klinikanın direktor müavini, Reproduktiv sağlamlıq və ailə planlaması mərkəzinin rəhbəri Gülnar Nuriyeva, rəssam Mirazər Abdulla, həmçinin bir sıra tibb müəssisələrinin həkim-mütəxəssisləri iştirak ediblər.
Açılış nitqi ilə çıxış edən B.Yusubov cəmiyyətin sağlamlığının əsasını qadın sağlamlığı təşkil etdiyini vurğulayaraq bu problemə üç əsas istiqamətdən - maarifləndirmə, profilaktika və erkən diaqnostika baxımından yanaşmağın vacib olduğunu bildirib. Direktor qadın sağlamlığında profilaktik tədbirlər sırasında HPV (papilloma virus infeksiyası) və skrininq testlərin aparılmasının vacibliyini qeyd edərək, bu testlərin vaxtında icrasının xərçəng və digər ginekoloji xəstəliklərin erkən mərhələdə aşkarlanmasında önəmli olduğunu diqqətə çatdırıb.
Zamirə Ədilova qeyd edib ki, qadın sağlamlığının qorunması dövlətin prioritet istiqamətlərindən biridir və bu sahədə TƏBİB tərəfindən ardıcıl, sistemli tədbirlər həyata keçirilir: “Süd vəzi xərçəngi xəstəliklərinin erkən aşkarlanması, profilaktikası və müalicəsi məqsədilə TƏBİB tərəfindən digər səhiyyə qurumları və özəl tərəfdaşlarla birgə aprelin 28-dən sentyabrın 13-dək səyyar mammoqrafiya aksiyaları keçirilib. Bu il 2 səyyar mammoqrafiya cihazı ilə təchiz edilmiş xüsusi ambulanslar istifadəyə verilib. Füzuli, Zəngilan rayonları da daxil olmaqla, ümumilikdə 22 rayonda 4 minə yaxın qadın skrininqlərə cəlb olunaraq, müayinələrdən keçib”.
Rəssam Mirazər Abdulla çıxışında qadının gücünün həyatın bütün sahələrində özünü göstərdiyini vurğulayaraq qadının ailədə, cəmiyyətdə və yaradıcılıqda güc, zəriflik və fədakarlıq rəmzi olduğunu deyib.
Sonda çıxış edən Gülnar Nuriyeva icbari tibbi sığortanın Xidmətlər Zərfi çərçivəsində TƏBİB-in müxtəlif tibb müəssisələrində, o cümlədən Yeni Klinikada təqdim olunan xidmətlərdə qadın sağlamlığına xüsusi önəm verildiyini bildirib.
Panel sessiyalarla davam edən seminar çərçivəsində Yeni Klinikanın həkim-mütəxəssisləri qadın sağlamlığı, xəstəliklərin qarşısının alınması və erkən diaqnostikanın üstünlükləri barədə məlumat verib, iştirakçıların suallarını cavablandırıblar.
Tədbirdə maarifləndirici təqdimatlar edilib, interaktiv müzakirələr aparılıb.
Bölmənin digər xəbərləri
