Xəbər verdiyimiz kimi martın 29-da ABŞ Silahların Beynəlxalq Daşınması haqqında qaydalara dəyişiklik etmişdir. Beləliklə, Azərbaycan və Ermənistan 1993-cü ildən bəri silahların və hərbi sahədə xidmətlərin idxal-ixracı qadağan olunan ölkələrin siyahısından çıxarılmışdır.

Ağ Evin mətbuat xidmətinin yaydığı məlumata ğörə, ABŞ Prezidenti Corc Buş Azərbaycan, Ermənistan və Tacikistana hərbi texnika göndərilməsinə və zəruri servis xidməti təqdim edilməsinə icazə verən memorandum imzalamışdır. Prezident bunun Birləşmiş Ştatların təhlükəsizliyinin və qlobal sülhün möhkəmlənməsinə cavab verdiyinə inanır.

ABŞ Prezidentinin bu qərarını AZƏRTAC-ın müxbirinə şərh edən Azərbaycanın Vaşınqtondakı səfiri Hafiz Paşayev bildirmişdir ki, mövcud qadağa ölkəmizə təhlükəsizlik və hərbi əməkdaşlıq sahəsində yardımın ğöstərilməsinə sonuncu hüquqi maneə idi. Memorandumun imzalanmasından sonra bu sahədə yeni proqramların planlaşdırılması daha da sürətləndiriləcəkdir.

Şəfəq Akifqızı

AZƏRTAC-ın xüsusi müxbiri

Vaşinqton