“YENİYETMƏLƏR ÜÇÜN HƏYAT BACARIQLARI” PROQRAMININ TƏQDİMATI OLMUŞDUR
Bakı, 21 dekabr (AZƏRTAC). “Uşaqların Xilası” (“Save the Children”) beynəlxalq təşkilatı Avropa İttifaqının proqramı və “Statoil” şirkətinin dəstəyi ilə Azərbaycanda gənclərə əlverişli iş imkanlarını yaratmaqla yoxsulluğu azaltmaq məqsədi ilə “Yeniyetmələr üçün həyat bacarıqları” proqramının icrasına başlamışdır.
Dekabrın 21-də proqramın təqdimatı olmuşdur. “Uşaqların Xilası” təşkilatının ölkə üzrə direktoru Corc Ciakomini, vətəndaş cəmiyyətinin inkişafına yönəlmiş belə bir layihənin keçirilməsini yüksək qiymətləndirmişdir.
Proqramın rəhbəri Bahar Arabova bildirmişdir ki, məqsəd yerli qeyri-hökumət təşkilatlarının imkan və bacarıqlarını möhkəmləndirməkdən, vətəndaş cəmiyyəti ilə hökumətin imkanlarından istifadə etməklə gənclərin ehtiyaclarını təmin etməkdən ibarətdir.
Proqram çərçivəsində “Uşaqların Xilası” və “Ümidli gələcək” təşkilatları Azərbaycanın 5 regionundan (Şəki, Gəncə, Lənkəran, Quba, Bakı) seçilmiş 5 yerli QHT-yə təlim və texniki yardım layihəsini təqdim edəcəklər. Proqram 3000 gənci əhatə edəcəkdir.
Bölmənin digər xəbərləri
