YENİYETMƏLƏRİN VI BEYNƏLXALQ ELM OLİMPİADASINDA İŞTİRAK ETMƏK ÜÇÜN ARTIQ 45 ÖLKƏ MÜRACİƏT ETMİŞDİR
Bakı, 16 oktyabr (AZƏRTAC). Dekabrda Bakıda keçirilməsi nəzərdə tutulan Yeniyetmələrin VI Beynəlxalq Elm Olimpiadasında iştirak etmək üçün artıq 45 ölkə müraciət etmişdir.
Gənclər və İdman Nazirliyindən bildirmişlər ki, Olimpiadaya hazırlıq məqsədi ilə artıq tədbirin keçirilməsinə məsul qurumların nümayəndələrinin iştirakı ilə işçi qrup yaradılmışdır.
İştirakçılar üçün yerli mütəxəssislər tərəfindən fizika, kimya və biologiya fənləri üzrə test, nəzəri və təcrübə tapşırıqları hazırlanmışdır. Təcrübə üçün avadanlıq xarici ölkələrin şirkətlərindən sifariş verilmişdir.
Olimpiadada iştirak edəcək xarici tələbələr, müəllimlər, müşahidəçilər üçün Azərbaycan tarixi və mədəniyyəti ilə tanışlıq üçün 6 səyahət marşrutu seçilmişdir.
Qonaqların müşahidəsi üçün 100-dək ingilisdilli könüllü müəyyənləşdirilib və onlar üçün əlavə hazırlıq keçirilmişdir.
Qeyd edək ki, dünyanın 50-dən çox ölkəsindən 15 yaşlı yeniyetmələrin qatılacağı olimpiadada suallar ingilis dilində olacaq və iştirakçılar eyni vaxtda fizika, kimya və biologiya fənləri üzrə qələbə uğrunda mübarizə aparacaqlar.
######
Bölmənin digər xəbərləri
