DÜNYA
YER KÜRƏSİNİN MƏRKƏZİNDƏ NƏHƏNG NÜVƏ REAKTORU AŞKAR EDİLMİŞDİR
Planetimizin mərkəzində ərinmiş dəmir və nikeldən ibarət özək yox, daimi nüvə reaksiyasına girən uranla plutonium xəlitəsi yerləşir. Təxminən 8 kilometrlik bu özək bir növ “nəhəng təbii nüvə reaktoru”dur. Bu fikri ABŞ Energetika Departamenti nəzdindəki laboratoriyanın alimləri irəli sürmüşlər.
Nüvə özəyinin “işi” nəticəsində Yer kürəsi ətrafında güclü maqnit sahəsi əmələ gəlir və o, planetin bütün bioloji həyatını bir neçə saniyədə külə döndərə biləcək təhlükəli kosmik şüalardan qoruyur. Təbii reaktor materik platformalarının hərəkətini də enerji ilə təchiz edir və vulkanların püskürməsində təzahür edir.
Alimlər həmçinin belə bir qənaətə gəlmişlər ki, Yer üzündə həyat güman olunduğundan xeyli əvvəl sona yetə bilər. Mütəxəssislərin hesablamalarına görə, planetimiz dörd milyard il deyil, cəmi iki milyard il yaşayacaqdır, çünki onun mərkəzindəki uran və plutonium çox tez yanıb qurtaracaqdır. Onların tükənməsi Yerin maqnit sahəsinin yox olmasına və “planetin bütövlükdə soyumasına” gətirib çıxaracaqdır.
İTAR-TASS-ın məlumatına görə, alimlər bu kəşfi Yerin maqnit sahəsi istiqamətlərinin hər 200 min ildən bir dəyişməsinin səbəblərini aydınlaşdırmaqla bağlı aparılan araşdırmaların gedişində etmişlər.