Yunan-Roma güləşçilərimiz “Qızıl Qran-pri” beynəlxalq turnirinə hazırlığı davam etdirirlər
Bakı, 18 noyabr (AZƏRTAC). Xəbər verildiyi kimi, noyabrın 22-24-də Bakıda ümummilli lider Heydər Əliyevin xatirəsinə həsr olunmuş güləş üzrə “Qızıl Qran-pri” beynəlxalq turnirinin final mərhələsi keçiriləcəkdir.
AZƏRTAC xəbər verir ki, Azərbaycan güləş yığmaları sayca 6-cı dəfə təşkil olunacaq turnirə ciddi hazırlaşırlar.
Yunan-Roma güləşçilərimiz yarış öncəsi son təlim-məşq toplanışını baş məşqçi Cəmşid Xeyrabadinin rəhbərlik etdiyi məşqçilər korpusunun nəzarətində davam etdirirlər. Olimpiya Güləş Mərkəzində ABŞ-dan olan iki güləşçi də turnirə yığmamızla birgə hazırlaşır.
Yarış ərəfəsində Azərbaycan Güləş Federasiyasının (AGF) birinci vitse-prezidenti, Beynəlxalq Güləş Federasiyasının (FİLA) İcraiyyə Komitəsinin üzvü Namiq Əliyev yunan-Roma güləşi üzrə yığma komandanın heyəti və məşqçilər korpusu ilə görüşmüşdür. AGF rəsmisi hazırlıq prosesinin gedişi və idmançıların vəziyyəti ilə maraqlanmışdır.
Baş məşqçi C.Xeyrabadi demişdir ki, Macarıstanda keçirilən dünya çempionatından sonra yığmamızın aparıcı üzvləri ilk beynəlxalq sınağa çıxacaqlar. Artıq 2 aydır ki, dünya çempionatı başa çatıb və biz yığma komanda olaraq ümummilli lider Heydər Əliyevin xatirəsinə həsr olunmuş “Qızıl Qran-pri” beynəlxalq turnirinin final mərhələsinə hazırlaşırıq. Moskvada keçirilən Avropa Kubokuna əsasən gənclərdən ibarət heyət göndərilmişdi. Yığmanın aparıcı üzvləri məhz “Qızıl Qran-pri” beynəlxalq turnirinin final mərhələsində mübarizə aparacaqlar. Çalışacağıq ki, Azərbaycanı layiqincə təmsil edək. Həm güləş azarkeşlərini sevindirək, həm də Federasiya rəhbərliyinin etimadını doğruldaq.
Qeyd edək ki, yunan-Roma güləşçiləri “Qızıl Qran-pri” beynəlxalq turnirinin final mərhələsinin ilk yarış günündə mübarizə aparacaqlar.
Bölmənin digər xəbərləri
