YUNANISTAN BAKI-TBİLİSİ-ƏRZURUM LAYİHƏSİNƏ QOŞULMAQ NİYYƏTİNDƏDİR
Yunanıstan Xəzər qazının Bakı-Tbilisi-Ərzurum boru kəməri ilə nəqlinə dair layihəyə qoşulmaq niyyətindədir. Yunanıstan Respublikasının inkişaf məsələləri naziri Apostolos Tsoxadzopulosun ölkəmizə iki günlük səfəri zamanı Azərbaycan tərəfi ilə müvafiq razılaşma əldə edilmişdir. Yunanıstan və Türkiyə hökumətləri, habelə Yunanıstanın “DEPA” və Türkiyənin “BOTAŞ” sirkətləri arasında lazımı sazişlər imzalanmışdır. Yunanıstan naziri jurnalistlərə bildirmişdir ki, bu məqsədlə Yunanıstan ərazisində 80 kilometr, Türkiyə ərazisində isə 200 kilometr uzunluğunda yeni boru kəmərləri çəkiləcəkdir. Tikintinin Türkiyə hissəsini Avropa Birliyi maliyyələşdirəcəkdir. Tikintini 2004-cü ildə başa çatdırmaq nəzərdə tutulmuşdur. Yunanıstanın Bakı-Tbilisi-Ərzurum layihəsinə qoşulmasından əsas məqsəd Xəzər qazının Balkan yarımadası ölkələrinə, oradan da Qərbi Avropaya daşımaqdır. Hazırda Avropa Birliyi ölkələrinin təbii qaza olan ehtiyacının 30 faizi Rusiya qazı hesabına təmin edilir.
Yunanıstan nümayəndə heyətinin səfəri zamanı İqtisadi İnkişaf Nazirliyində, ARDNŞ-də, Gənclər, İdman və Turizm Nazirliyində, Yanacaq və Energetika Nazirliyində görüşlər keçirilmiş, energetika, ticarət, turizm, habelə gənclərin nümayəndə heyətləri arasında mübadilə sahəsində əməkdaşlığın inkişaf etdirilməsi məsələləri müzakirə olunmuşdur. Yunanıstan Azərbaycanda özəl sektorun inkişafı üçün xüsusi proqramları və təhsil sahəsində proqramları gerçəkləşdirməyə başlamaq niyyətindədir.
Yunanıstanın inkişaf naziri bildirmişdir ki, səfər zamanı mətbuat üçün birgə bəyanat qəbul ediləcəkdir. Bəyanatda Xəzər regionundan təbii qaz alınmasına dair Yunanıstanın “DEPA” şirkəti ilə ARDNŞ arasında əməkdaşlıq təşəbbüsü bəyənilir.
Bölmənin digər xəbərləri
