YUNANISTANIN ÖLKƏMİZDƏKİ SƏFİRİ ZAQATALADA OLMUŞDUR

07.11.2006 [12:36]
Çap et
A⁺ A^-

AZƏRTAC-ın müxbiri xəbər verir ki, Yunanıstanın ölkəmizdəki səfiri Temistokles Dimidis noyabrın 6-da Zaqatala rayonuna gəlmişdir. Səfir Yunanıstanın maliyyə yardımı ilə rayonun Mosul kənd orta məktəbində aparılan təmir işlərinin gedişi ilə tanış olmuşdur.

Məktəb kollektivi qarşısında çıxış edən səfir Temistokles Dimidis bildirmişdir ki, kənd məktəbinin təmiri Yunanıstan Xarici İşlər Nazirliyinin İnkişafa Yardım üzrə Beynəlxalq Əməkdaşlıq Xidməti tərəfindən maliyyələşdirilir. Məktəbin təmiri yunanların dost Azərbaycanda təhsil, səhiyyə və mədəniyyətin inkişafı sahəsində həyata keçirdiyi çoxsaylı tədbirlərdən biridir.

Rayon icra hakimiyyətinin başçısı Asif Əsgərov tədbirdə çıxış edərək bu nəcib və xeyirxah təşəbbüsə görə rayon ictimaiyyəti və kənd sakinləri adından Yunanıstan hökumətinə minnətdarlığını bildirmişdir.

Sonra qonaqlar məktəbdə aparılan təmir işlərinin gedişi ilə tanış olmuş, təkliflərini bildirmişlər.