Yunis Hüseynov: Gəncədə müasir standartlara cavab verən stadionun inşası məni qürurlandırır
Bakı, 21 avqust, AZƏRTAC
Prezident İlham Əliyevin və birinci xanım Mehriban Əliyevanın idmana və idmançılara qayğısı danılmazdır.
Bu sözləri AZƏRTAC-a açıqlamasında “Kəpəz”in sabiq futbolçusu və baş məşqçisi Yunis Hüseynov Prezident İlham Əliyevin və birinci xanım Mehriban Əliyevanın avqustun 20-də Gəncə şəhər stadionunda aparılan tikinti işlərinin gedişi ilə tanış olmaları barədə danışarkən deyib.
Gəncəli futbol veteranı bildirib ki, doğma şəhərində müasir standartlara cavab verən arenanın inşası onu qürurlandırır: “Azərbaycan hər zaman beynəlxalq yarışlara layiqincə ev sahibliyi edib. İdmançılarımız həm Azərbaycanda, həm də ölkə xaricində uğurlu nəticələr qazanırlar. Ölkə rəhbərliyi də bunu hər zaman qiymətləndirir. Bunlar hər kəsə məlumdur. Olimpiya komplekslərinin, stadionların inşası və gənclərin istifadəsinə verilməsi çox vacib addımdır. Ötən gün Prezident İlham Əliyev və birinci xanım Mehriban Əliyeva Gəncə şəhər stadionunda aparılan tikinti işlərinin gedişi ilə tanış olublar. Buna görə dövlətimizin başçısına təşəkkür edirəm. Gəncə böyük futbolçular yetişdirib. Əvvəlki stadion 1963-cü ildə tikilmişdi. Arzu edirəm ki, “Kəpəz” komandası yeni arenada özünü yaxşı tərəfdən göstərsin və buradan istedadlı futbolçular çıxsın”.
Qeyd edək ki, bu il sentyabrın 28-dən oktyabrın 8-dək Azərbaycan növbəti böyük idman yarışına - III MDB Oyunlarına ev sahibliyi edəcək. Bunun üçün bir neçə şəhər və rayon seçilsə də, yarışın açılış və bağlanış mərasimləri, həmçinin əsas oyunlar Gəncədə keçiriləcək.
Bölmənin digər xəbərləri
