Zaqatalada "Boz Qafqaz" arı cinsinin genofondu qorunur
Zaqatala, 22 yanvar, Mustafa Dadaşov, AZƏRTAC
Damazlıq-seleksiya işinin yüksək səviyyədə aparılması arıçılığın inkişafında mühüm rol oynayır.
Bu sözləri AZƏRTAC-ın bölgə müxbirinə açıqlamasında Azərbaycan Arıçılar Assosiasiyası Zaqatala rayon şöbəsinin və “Eko Zaqatala” MMC-nin rəhbəri, peşəkar arıçı Mövlüddin Qurbanəliyev deyib.
Təsərrüfat rəhbəri bildirib ki, bal arısı cinslərinin təmizliyinin təmin edilməsi və qorunub saxlanılması məqsədilə ana arıların təbii mayalanması üçün Zaqatala rayonunda tarixən mövcud olmuş “Boz Qafqaz” arı cinsinin təmizqanlı genofondunun qorunması, çoxaldılması və ana arıya olan tələbatın öyrənilməsi ilə əlaqədar son illər rayonda məqsədyönlü tədbirlər həyata keçirilir. Belə ki, Kənd Təsərrüfatı, Ekologiya və Təbii Sərvətlər nazirliklərinin rəylərinə əsasən, rayonun Meşleş kəndinin yuxarı hissəsində, Car meşəbəyliyinin 1 saylı dolayı üzrə 9-cu kvartal dağlıq-meşə ərazisində damazlıq təsərrüfatı üçün təxminən 6 kilometr radiusda 28 min 26 hektar sahədə təcrid bölgə müəyyən edilərək ayrılıb. Hazırda arıçılıq damazlıq təsərrüfatında 130 ədəd “Boz Qafqaz” arı cinsi ailəsində seleksiya işləri davam etdirilir.
Mövlüddin Qurbanəliyev deyib: “Bu bölgədə tarixən mövcud olan və dünyada ən məhsuldar arı cinslərindən sayılan “Boz Qafqaz” cinsi getdikcə cırlaşır, mələzləşir. Ona görə də məhsuldarlıq ildən-ilə aşağı düşür. Bizim bölgədə bir arı ailəsinin (bir pətək) normal məhsuldarlığı 15 kiloqram bal olmalıdır. Lakin son illər arıçılarımız bu qədər məhsul əldə edə bilmirlər. Cırlaşmış arılar bir pətəkdən yaxşı halda 5-7 kiloqram bal verir. Bundan əlavə, son illər baş verən iqlim dəyişiklikləri, qlobal istilər də məhsuldarlığa mənfi təsir göstərir. Ona görə də arıçılıqda damazlıq işinin təşkili çox vacib məsələdir. Bütün arıçılıq təsərrüfatlarının damazlıq ana arıya ehtiyacı var”.
Təsərrüfat rəhbəri bildirib ki, arıçılıq iqtisadi cəhətdən gəlirli sahə olmaqla yanaşı, eyni zamanda, ekoloji mühitin yaxşılaşdırılmasına, ekologiyanın qorunmasına da müsbət təsir göstərir. Məhz arı tozlandırması sayəsində yer üzünün bitki aləmi, meşələr, ətraf mühit daha da yaxşılaşır, inkişaf edir.
Qeyd edək ki, hazırda Zaqatala rayonunda 1400-dən artıq arıçılıq təsərrüfatında 40 minədək arı ailəsinə xidmət olunur. Bu təsərrüfatlarda il ərzində təxminən 400 ton bal, 45 ton mum, 650 kiloqram çiçək tozu, 240 kiloqram vərəmum, 14-16 kiloqram arı südü və sair məhsullar istehsal olunur. Rayonun təbii iqlim şəraiti gələcəkdə arıçılıq məhsullarının istehsalının daha da artırılmasına imkan verir.
Bölmənin digər xəbərləri
