Zaqatalada cari mövsümdə 18 ton yaş barama istehsalı proqnozlaşdırılır
Zaqatala, 22 may, AZƏRTAC
Builki mövsümdə Zaqatala rayonunda yaş barama istehsalının 18 tona çatdırılması qarşıya hədəf qoyulub. Barama yetişdirmək üçün 270-dək kümçü ilə müqavilə bağlanılıb və onlara rayondakı yaş barama qəbulu və qurutma məntəqəsində inkubasiya olunmuş 450 qutu, yəni 8 kiloqram 550 qram ipəkqurdu paylanılıb. Hazırda ailə təsərrüfatlarında ipəkqurdunun yemlənməsi prosesi davam edir.
AZƏRTAC-ın bölgə müxbiri rayonun Göyəm kənd inzibati ərazi dairəsi üzrə nümayəndəliyində kümçü ailələrinin təsərrüfatlarında olub, ipəkqurdunun yemlənməsi prosesini izləyib.
Sumaylı kəndindən Muradovlar ailəsi uzun illərdir ki, baramaçılıqla məşğul olur. Ötən il Muradovlar ailəsi 70 qram ipəkqurdu bəsləyib, 210 kiloqram yaş barama istehsal edib. Ailə qısa müddətdə baramaçılıqdan 2300 manatdan çox gəlir qazanıb. Kümçü ailəsi builki mövsümdə 52 qram ipəkqurdu bəsləyir. Təsərrüfatçılar ipəkqurdunun bəslənməsi üçün həyətlərindəki yardımçı tikilidə xüsusi yer ayırıb, rəflər quraşdırıblar. İpəkqurdunun yemlənməsi üçün lazım olan tut yarpağını həyətdəki, həmçinin kənd ərazisindəki tut ağaclarından tədarük edirlər.
Baramaçılığın çox sərfəli və gəlirli sahə olduğunu bildirən təsərrüfat sahibi Zahidət Muradova deyib: “Baramaçılıqda çox qısa müddətdə, yəni bir ay ərzində çəkdiyin zəhmətin bəhrəsini görürsən. Bitkiçilikdə, heyvandarlıqda isə məhsul götürmək üçün neçə ay gözləməli olursan. Bu il ailəmiz 52 qram ipəkqurdu götürüb, 200 kiloqramadək yaş barama istehsal etməyi qarşıya məqsəd qoymuşuq”.
Kümçü söhbət əsnasında bildirib ki, baramaçılıq, eyni zamanda, çox zəhmət tələb edən sahədir. “Havalar soyuq keçəndə xərclərimiz daha da artır. Ona görə də yaş baramanın alış qiyməti artırılarsa, kənd adamlarının bu sahəyə marağı daha da artar”,- deyə kümçü əlavə edib.
Xatırladaq ki, ötən il olduğu kimi, builki mövsümdə də istehsal olunan yaş baramanın hər kiloqramı üçün kümçülərə 11 manat ödənilməsi nəzərdə tutulur.
Dardoqqaz kənd sakini Rəfiqə Mehdiyeva isə 4-cü ildir ki, baramaçılıqla məşğul olur. Onun ailəsi keçən il 35 qram ipəkqurdu bəsləyib, 137 kiloqram yaş barama istehsal edib. Ailə cari mövsümdə 40 qram ipəkqurdunun yemlənməsi ilə məşğul olur və 150 kiloqramdan çox yaş barama istehsal etməyi qarşıya məqsəd qoyub.
Kənddə olarkən inzibati ərazi dairəsi üzrə nümayəndə Ramazan Şabanovla qarşılaşırıq. Qeyd edək ki, nümayəndəliyə 4 kənd – Çökək, Göyəm, Sumaylı və Dardoqqaz kəndləri daxildir. Nümayəndənin sözlərinə görə, ötən il bu kəndlərin kümçüləri, ümumilikdə, 1200 kiloqramdan çox yaş barama istehsal ediblər. Bir ay müddətində kümçü ailələri baramaçılıqdan 13 min manatdan çox gəlir götürüblər. Builki mövsümdə isə nümayəndəlik üzrə 9 kümçüyə 600 qram ipəkqurdu paylanılıb. Cari mövsümdə də yaş barama istehsalının 1200 kiloqramdan çox olacağı gözlənilir.
Müxbir – Mustafa Dadaşov
Bölmənin digər xəbərləri
