ZAQATALADA PAYIZLIQ TAXIL SƏPİNİ BAŞA ÇATMIŞDIR
Zaqatala Rayon İcra Hakimiyyətindən AZƏRTAC-a bildirmişlər ki, taxılçılıq təsərrüfatlarında 2009-cu ilin məhsulu üçün payızlıq səpin başa çatmışdır.
Cari mövsümdə 11 min 889 hektar sahədə taxıl əkilmişdir ki, bu da əvvəlki illə müqayisədə 3 min 264 hektar və ya 37,8 faiz çoxdur. Əkin sahələrinin 8 min 785 hektarını buğda, 3 min 104 hektarını isə arpa sahələri təşkil edir. Kampaniya dövründə “Aqrolizinq” Səhmdar Cəmiyyətinin xətti ilə fermerlərə şum altına verilmək üçün güzəştli qiymətlərlə 135 ton azot və 205 ton fosfor gübrələri satılmışdır.
Nazirlər Kabinetinin buğda istehsalçılarının maddi marağının artırılması və buğda istehsalının stimullaşdırılması ilə bağlı müvafiq qərarı Zaqatala rayonunda da buğda əkininə marağı xeyli artırmışdır. Bunun nəticəsidir ki, cari mövsümdə rayonda buğda əkini sahələri əvvəlki ilə nisbətən 3 min hektara yaxın və ya 50 faiz artmışdır.
Xatırladaq ki, 2008-ci ildə rayonda 21 min 696 ton taxıl istehsal olunmuşdur. Bu, əvvəlki illə müqayisədə 2,3 dəfə çoxdur.
Bölmənin digər xəbərləri
