ZAVOD TAM GÜCÜ İLƏ İŞLƏMƏYƏ BAŞLAMIŞDIR

14.10.2003 [20:33]
Çap et
A⁺ A^-

“Azərenerji”nin mətbuat mərkəzindən AZƏRTAC-a bildirmişlər ki, hələ 20 il bundan əvvəl “Şüşə lifi” zavodu məhsullarının 75 faizi keçmiş İttifaqın tikinti meydançalarına göndərilirdi. Hazırda müəssisənin məhsullarına ehtiyacı olan baş enerji idarəsinin təkidi sayəsində zavod yenidən fəaliyyətə başlamışdır. İndi zavodda təxminən 200 adam çalışır, ilin sonunadək isə onların sayı yarıbayarı artacaqdır.

Müəssisənin tam gücü ilə işləməsi üçün xammal - şüşə kürəciklər, habelə dəzgahlar üçün keramik makaralar tələb olunurdu. “Azərenerji” rəhbərliyinin əldə etdiyi 70 ton şüşə kürəcik, - onlardan şüşə lifi və makaralar hazırlanır, - zavoda verilmişdir. Bunun sayəsində müəssisədə ay ərzində izolyasiya üçün 1 milyon metr lent və 50 min paqonmetr lif istehsalı qaydaya salınmışdır. Həmin məhsullara həm Mingəçevirin özündə, həm də Azərbaycanın digər sənaye mərkəzlərində ehtiyac var.

Bundan əlavə, “Azərenerji” zavodun məhsulunun xarici bazara çıxarılması məsələsinin həllini də öz üzərinə götürmüşdür.