Zəfər Günü münasibətilə Aktöbe, Mangistau və Uralsk-Qərbi Qazaxıstan vilayətlərində silsilə tədbirlər keçirilib
Bakı, 13 noyabr, AZƏRTAC
Azərbaycanın Aktaudakı Baş konsulluğunun təşkilatçılığı və dəstəyi ilə Aktöbe, Mangistau və Uralsk-Qərbi Qazaxıstan vilayətlərində Zəfər Günü və Dövlət Bayrağı Günü münasibətilə silsilə tədbirlər keçirilib.
Bu barədə AZƏRTAC-a Aktuadakı Baş konsulluğundan xəbər verilib.
Azərbaycan icması ilə birgə Aktau şəhərində keçirilən tədbirdə şəhər administrasiyasının rəhbərliyi, Türkiyənin Aktau şəhərindəki Baş konsulluğunun heyəti, vilayət üzrə yerli icra qurumlarının nümayəndələri, Azərbaycanlı və türk iş adamları, icma fəalları, gənclər iştirak ediblər.
Tədbirdə əvvəlcə Azərbaycanın və Qazaxıstanın Dövlət himnləri səsləndirilib, şəhidlərimizin xatirəsi bir dəqiqəlik sükutla yad edilib.
Sonra Baş konsul Elçin Məmmədov çıxış edərək Zəfər Gününün tarixi əhəmiyyəti barədə ətraflı məlumat verib.
Diplomat Ermənistan-Azərbaycan münaqişənin tarixi, səbəbləri, ermənilərin zaman-zaman azərbaycanlılara qarşı törətdikləri vəhşiliklər, münaqişənin həlli istiqamətində aparılan danışıqlar, beynəlxalq təşkilatların qətnamələri, 2016-cı il Aprel döyüşləri, İkinci Qarabağ müharibəsi, lokal xarakterli antiterror tədbirləri barədə ətraflı məlumat verib. Bildirib ki, şanlı Zəfərimizin əsasını Müzəffər Ali Baş Komandan, Prezident İlham Əliyevin qətiyyəti, eyni zamanda, xalqla iqtidar birliyi təşkil edib.
İkinci Qarabağ münaqişəsi zamanı qardaş Türkiyənin siyasi mənəvi dəstəyi də xüsusi vurğulanıb.
Türkiyənin Aktau şəhərindəki Baş konsulu Sabri Alptəkin Zəfər Günü münasibətilə Azərbaycan xalqını təbrik edərək, bu tarixi Zəfərin, həmçinin Türk dünyasının zəfəri olduğunu qeyd edib.
“Dostluq” Milli-Mədəni Cəmiyyətinin sədri, vilayət üzrə Azərbaycan icmasının rəhbəri Şəmsəddin Hüseynov və digər icma fəalları bayram münasibətilə təbriklərini çatdırıblar.
Zəfər Günü və 9 Noyabr - Dövlət Bayrağı Günü münasibətilə Yessenov adına Dövlət Universitetində Baş konsulluğun və Azərbaycan Mərkəzinin dəstəyi ilə azərbaycanlı tələbələrlə interaktiv görüş keçirilib. Tədbirdə Türkiyənin Aktau şəhərindəki Baş konsulluğunun heyəti, Azərbaycan icmasının fəalları, iş adamları, Mangistau vilayətinin Veteranlar Şurasının nümayəndələri, sözügedən universitetin professor-müəllim heyəti, tələbələr iştirak ediblər.
Görüşdə şanlı Zəfərimizin tarixi barədə məruzələr dinlənilib. Çıxış edənlər Qarabağ münaqişəsinin tarixi, həqiqətləri, xalqımıza qarşı tarixən törədilən Bakı, Quba qətliamları və digər erməni vəhşilikləri, əsassız torpaq iddiaları barədə məlumat verilib.
Ulu Öndər Heydər Əliyevin SSSR-i rəhbərliyindən ayrıldıqdan sonra münaqişənin yenidən alovlandığı, 1990-cı illərin əvvəllərində erməni hərbi birləşmələrinin havadarlarının dəstəyi ilə torpaqlarımıza təcavüz edildiyi, nəticədə torpaqlarımızın 20 faizinin işğal olunduğu, 1 milyondan çox həmvətənlərimizin doğma dədə-baba torpaqlarından qovulduğu, etnik təmizlənməyə məruz qaldıqları və bununla yanaşı XX əsrdə misli görünməyən qətliamın, xalqımıza qarşı Xocalı soyqırımının törədildiyi dinləyicilərin diqqətinə çatdırılıb.
Ölkəmizin ağır dövründə xalqın təkidi ilə hakimiyyətə gələn Ulu Öndər Heydər Əliyevin uğurlu daxili və xarici siyasəti, neft strategiyası, həmçinin dövlət quruculuğunda, müdafiə və təhlükəsizlik sahəsində aparılan islahatları barədə məlumat verilib, ölkəmizin qısa müddətdə iqtisadi, siyasi və hərbi qüdrəti ilə regionda lider dövlətə çevrildiyi vurğulanıb.
Bildirilib ki, Ulu Öndərin siyasi kursunun davamçısı Müzəffər Ali Baş Komandan, Prezident İlham Əliyev tərəfindən ölkənin müdafiə qabiliyyətinin və milli təhlükəsizliyinin daha da gücləndirilməsi məqsədilə orduda və müdafiə sənayesində islahatlar həyata keçirilib, ordunun maddi-texniki təchizatı müasirləşdirilib, hərbi potensialın artırılması istiqamətində müvafiq tədbirlər görülüb. Nəticədə nizamlı, müasir, yenilməz ordu yaradılıb. Məhz görülmüş işlərin nəticəsi olaraq, Müzəffər Ali Baş Komandan İlham Əliyevin rəhbərliyi ilə rəşadətli Ordumuz tərəfindən 2020-ci ildə 44 günlük Vətən müharibəsində şanlı Zəfər qazanılıb. Cari il sentyabrın 19-da keçirilən lokal xarakterli antiterror tədbirlər nəticəsində tarixi ədalət bərpa olunub.
Türkiyənin Baş konsulu Sabri Alptəkin, “Dostluq” Milli-Mədəni Cəmiyyətinin sədri, vilayət üzrə Azərbaycan icmasının rəhbəri Şəmsəddin Hüseynov, Veteranlar Şurasının sədr müavini Niyaz Abdurəşid, Universitetin Beynəlxalq münasibətlər fakültəsinin dekanı Akmaral Oratova çıxış edərək Zəfər Günü münasibətilə xalqımızı təbrik edib, xoş arzularını çatdırıblar.
Sonra tədbirdə tələbələrin təqdimatları olub, videoçarxlar nümayiş etdirilib.
Qeyd edək ki, Baş konsulluğun təşəbbüsü ilə Aktöbe və Uralsk-Qərbi Qazaxıstan vilayətlərində Azərbaycan icması tərəfindən 8 Noyabr Zəfər Günü və 9 Noyabr - Dövlət Bayrağı Günü münasibətilə bayram tədbirləri keçirilib.
Bölmənin digər xəbərləri
