Bakı, 8 noyabr, AZƏRTAC

Cənubi Qafqazda yerləşən və müxtəlif dövrlərdə etnik zəmində müharibələrə meydan olan Qarabağ bölgəsi və ona bitişik ərazilər 1990-cı illərdə baş verən müharibə nəticəsində işğal olunmuşdu. Ermənilər və ermənipərəst dövlətlər tərəfindən Ermənistanın bir hissəsi kimi göstərilməyə çalışılan Qarabağ münaqişəsi həm regional sabitlik, həm də regional təhlükəsizlik baxımından böyük problemə çevrilmişdi. Bu səbəbdən Qarabağ probleminin həlli son dərəcə strateji vacib məsələ kimi Azərbaycanın qarşısında dayanmışdı. Ermənistanın təxribatlarına cavab olaraq əks-hücumla başlayan hərbi əməliyyatların Zəfərlə yekunlaşması postsovet məkanının ən qanlı və faciəli hadisələrindən biri olan münaqişəyə son qoydu. İndi Cənubi Qafqaz regionu, eləcə də türkdilli xalqların yaşadığı geniş ərazi Azərbaycanın və qardaş Türkiyənin birgə səyləri ilə özünün tarixi inkişafında yeni mərhələyə daxil olur.

Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyası İdarə Heyətinin üzvü Rəşad Mahmudov söyləyib.

O qeyd edib ki, əslində, Azərbaycanın illərdir bu problemin qan tökülmədən həllini tapmağa çalışdığını hər kəs bilir. Lakin Ermənistanın təxribatçı hərəkətləri ucbatından Azərbaycanın qırmızı xətlərini pozması rəsmi Bakının nisbətən səssiz qaldığı dövrün sonunu gətirdi. “Bu hadisələr zamanı Ermənistanın atdığı iki mühüm addımı açıqlamaq lazımdır. Bunlardan birincisi, Ermənistanın keçmiş müdafiə naziri Davit Tonoyanın “yeni bölgələrdə yeni müharibə” bəyanatıdır. Bundan başqa, “Qarabağ müharibəsi yenidən alovlansa, o zaman Bakıda bitəcək” bəyanatı da tərəflər arasında gərginliyi artırdı. İkincisi, Ermənistanın baş naziri Nikol Paşinyanın açıqlamaları oldu. “Qarabağ Ermənistandır və nöqtə!” deməklə erməni baş nazir Cənubi Qafqazı “barıt çəlləyi”nə çevirmiş münaqişənin fitilini yandırdı. Məsuliyyətsiz, təxribatçı addım və açıqlamalar 30 illik münaqişəni qansız həll etməyə həvəsi olmayan Ermənistan rəhbərliyinin və havadarlarının niyyəti aydınlaşdı. Qırx dörd gün davam edən İkinci Qarabağ müharibəsində Azərbaycan Silahlı Qüvvələri Ermənistanın işğalçı ordusunu darmadağın edərək, ermənilərin yandırdıqları fitili söndürdü, işğalçılara əsrin zərbəsini endirdi. Ermənistan təslim oldu ki, bu da onun 30 ilə yaxın müddətdə Azərbaycana qarşı yürütdüyü işğalçılıq siyasətinin məntiqi nəticəsi idi”, - deyə deputat bildirib.

Rəşad Mahmudovun sözlərinə görə, bu Qələbənin qazanılması onilliklər boyu davam edən dövlət quruculuğunun, müasir dünyanın ən yaxşı ordularından birinin yaradılması nəticəsində mümkün oldu. Keçmiş SSRİ-dən qalmış ağır sosial-iqtisadi mirası səmərəli şaxələndirilmiş iqtisadi islahatlar sayəsində aradan qaldıran və dövlət problemlərinin həllinə uyğunlaşdırılmış siyasi sistem yaradan Azərbaycan rəhbərliyi 44 gündə misilsiz qələbə qazandı: “Ona görə misilsiz qələbədir ki, Azərbaycan təkcə Qarabağ separatçılarını və erməni qoşunlarını deyil, həm də son 200 ildə qondarma “Artsax” layihəsini mifik “yaradılış”ın yaradılması üçün ilkin şərt kimi bəsləyən dünya ermənilərinin “dənizdən dənizə böyük Ermənistan” layihəsini dənizdə batırdı. Eyni zamanda, Azərbaycanın Qələbəsi müasir tarixdə epoxal əhəmiyyətlidir. Çünki 30 illik münaqişənin silah gücü ilə həlli praktikasında ilk dəfə erməni təxribatına cavab olaraq Azərbaycan “Dəmir yumruq” əməliyyatını həyata keçirdi. Əks-hücumla Azərbaycan Ordusu düşməni düz çökdürdü, Ermənistanı kapitulyasiya aktına imza atmağa məcbur etdi. Ulu Öndər Heydər Əliyevin arzusunu Prezident, Ali Baş Komandan İlham Əliyev həyata keçirdi, onun rəhbərliyi ilə rəşadətli Azərbaycan Ordusu erməni işğalına son qoydu. Azərbaycan BMT Təhlükəsizlik Şurasının 30 ilə yaxın icrasını gözləyən dörd qətnaməsinin tələblərini yerinə yetirmək missiyasını öz üzərinə götürərək beynəlxalq hüququ pozan Ermənistanı cəzalandırdı.

Ancaq müharibənin Ermənistanın tam məğlubiyyəti ilə başa çatmasına baxmayaraq, işğalçı ölkənin tərəfdarları Xankəndidə yuva salmış quldur rejimin qalıqlarının qorunub saxlanması üçün canfəşanlıq göstərməyə başladılar. Bu məkrli planın müəllifləri rəsmi Bakıya qarşı açıq-aşkar güclü siyasi təzyiqə əl atmaqdan da çəkinmədilər. Lakin heç bir siyasi manipulyasiyalara yol verməyəcəyini vurğulayan Azərbaycan ərazi bütövlüyünün bərpasına mane olacaq istənilən cəhdin qarşısını alacağını çəkinmədən dünyaya bəyan etdi. Belə də oldu, Ermənistanın üç il ərzində sülh danışıqları ətrafında ancaq imitasiya ilə məşğul olduğunu və bu müddət ərzində qoşun hissələrini Qarabağdan çıxarmadığını, əksinə, mina terroru həyata keçirdiyini, habelə digər təxribatçı fəaliyyət göstərdiyini diqqətə alan Azərbaycan konstitusiya quruluşunun bərpa edilməsi məqsədilə Qarabağda lokal xarakterli antiterror tədbirləri həyata keçirdi. Nəticədə Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarıldı. Mülki əhali və infrastruktur obyektləri hədəfə alınmadı, yalnız legitim hərbi hədəflər zərərsizləşdirildi. Sentyabrın 28-də isə Azərbaycanın Qarabağ bölgəsindəki qondarma rejim özünü ləğv etdiyini elan etdi. Geniş mənada bu, 200 il əvvəl Rusiya imperiyası ilə İran arasında imzalanmış Gülüstan və Türkmənçay müqavilələri nəticəsində regionda əsası qoyulmuş “erməni layihəsi”nin bir hissəsinin başa çatması deməkdir”.

Deputat sonda bildirib ki, Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad Qələbəmizin möhtəşəm simvoluna çevrildi. Bu parad sadəcə bir hərbi ritual deyildi, bu, Müzəffər Ali Baş Komandanın rəhbərliyi altında Azərbaycan Ordusunun qələbə təntənəsi idi. Zəfər Günündə abadlaşan Kəlbəcər, yenidən qurulan Şuşanın ardınca, ermənilərin separatizm yuvasına çevirib qaçdıqları Xankəndidə belə bir tədbirin yüksək səviyyədə keçirilməsi ilə Prezident İlham Əliyev bir daha dünyaya dövlətin və xalqın mənafeyi naminə güc nümayişinin də, abadlıq-quruculuq işlərinin də ən mükəmməl örnəyinə müəlliflik etdiyini göstərdi. Eyni zamanda, uzun müddət hərbi xunta rejiminin yuvasına çevrilən Xankəndidə qalib ordunun Zəfər paradı bütün anti-Azərbaycan qüvvələri üçün ərazi bütövlüyümüzün yekun möhürü oldu.

“Dövlətimizin başçısının Xankəndi paradında çıxışı, səsləndirdiyi bəyanatlar bizə bir daha qalibiyyətin, yenilməzliyin qürurunu yaşatdı. Biz belə Azərbaycan, belə lider arzulamışdıq.

Azərbaycan lideri İlham Əliyev həm Prezident, həm də Ali Baş Komandan kimi Zəfər Gününə daha bir zəfər, bayram əlavə etdi. Onun Azərbaycan naminə dövlət və xalq sevgisi ilə yürütdüyü milli siyasət gələcək yüksəlişlərin və qələbələrin təminatıdır”, - deyə Rəşad Mahmudov vurğulayıb.