Zemfira Meftaxetdinova: İdmançılarımız ənənəyə sadiq qalaraq daha yüksək nəticələr əldə etməyi hədəfləyirlər
Bakı, 3 avqust, AZƏRTAC
Tokio Yay Olimpiya Oyunlarına hazırlıq həlledici mərhələyə qədəm qoyub. Azərbaycanın Olimpiya komandası bu nüfuzlu turnirə hazırlığı yüksək səviyyədə davam etdirir. Sonuncu Olimpiya Oyunlarında - “Rio 2016”da 18 medal qazanan Azərbaycan komandası bu göstəriciyə görə 14-cü yeri tutub. Bu, bizim üçün çox böyük nailiyyətdir. İdmançılarımız ənənəyə sadiq qalaraq daha yüksək nəticələr əldə etməyi hədəfləyirlər.
Bu sözləri stend atıcılığı üzrə Olimpiya çempionu Zemfira Meftaxetdinova AZƏRTAC-a məxsusi müsahibəsində deyib.
Z.Meftaxetdinova bildirib ki, idman sahəsində qazanılan hər bir möhtəşəm qələbə cəmiyyətimizdə vətənpərvərlik ruhunu artırır. Bu qələbələr sayəsində Azərbaycan dünyada güclü idman ölkəsi kimi tanınır. Bu yaxınlarda Bakıda keçirilmiş Avropa Gənclər Olimpiya Festivalında gənc atletlərimiz əzmkarlıq nümayiş etdirərək 23 medal qazanıblar. Festivalda gənc idmançılarımızın nəticələri onların güclü potensiala malik olduqlarını nümayiş etdirir. Komandamız bu mötəbər yarışda 23 medal - 10 qızıl, 7 gümüş və 6 bürünc qazanıb. Azərbaycan millisi komanda hesabında dördüncü pillədə qərarlaşıb.
Ölkəmizdə idman infrastrukturunun yaradılması işində böyük uğurların əldə edildiyini xüsusi vurğulayan Olimpiya çempionu deyib ki, paytaxtda, eləcə də bölgələrdə Olimpiya İdman kompleksləri, müasir standartlara cavab verən idman arenaları və müxtəlif təyinatlı idman qurğuları inşa edilib və bu iş böyük uğurla davam etdirilir. Ölkəmizin geniş idman infrastrukturu bu gün ən mötəbər yarışların respublikamızda keçirilməsi üçün böyük imkanlar yaradır. Azərbaycanda I Avropa, IV İslam Həmrəyliyi oyunları kimi mötəbər turnirlər uğurla keçirilib. Dörd ildir Bakıda Formula 1 yarışları keçirilir və bu nüfuzlu turnir paytaxtımızda hər il yüksək səviyyədə təşkil edilir.
İdmanın Azərbaycan cəmiyyətinin ayrılmaz hissəsinə çevrildiyini vurğulayan Z.Meftaxetdinova bildirib ki, yeniyetmə və gənclərimiz beynəlxalq turnirlərdə, Avropa və dünya birinciliklərində çoxlu medallar qazanırlar. Əldə olunan nailiyyətlər Azərbaycan komandasının növbəti Olimpiya Oyunlarında daha böyük qələbələr qazanacaqlarını demək üçün möhkəm zəmin yaradır. Əminik ki, Tokio Yay Olimpiya Oyunlarında da idmançılarımız böyük uğura imza atacaqlar.
Bölmənin digər xəbərləri
