İQTİSADİYYAT
“Ziraat Bank”ın Azərbaycandakı fəaliyyəti müzakirə edilib
Bakı, 29 oktyabr, AZƏRTAC
İqtisadiyyat naziri Mikayıl Cabbarov Türkiyə Banklar Birliyinin İdarə Heyətinin sədri, “Ziraat Bank”ın baş direktoru Alpaslan Çakarla görüşüb.
Nazirliyin mətbuat xidmətindən AZƏRTAC-a bildirilib ki, iqtisadiyyat naziri Azərbaycanda yaradılmış əlverişli biznes və investisiya mühitini, ölkəmizin investisiya cəlbediciliyini, işğaldan azad edilmiş torpaqlarımızın böyük iqtisadi potensialını, zəngin təbii resurslara malik olduğunu diqqətə çatdırıb, biznes üçün geniş imkanları vurğulayıb. Bildirilib ki, Türkiyə Banklar Birliyi və “Ziraat Bank”ı ilə uğurlu əməkdaşlıq edilir və bu tərəfdaşlıq çərçivəsində 2019-cu ildə İqtisadiyyat Nazirliyinin tabeliyində Kiçik və Orta Biznesin İnkişafı Agentliyi (KOBİA), “Ziraat Bank Azərbaycan” ASC və “Türk Eximbank” arasında əməkdaşlığa dair üçtərəfli Niyyət Protokolu, həmçinin KOBİA və Türk Katılım Bankları Birliyi arasında anlaşma memorandumu imzalanıb.
Nazir Azərbaycan-Türkiyə iqtisadi əlaqələrinin genişləndirilməsində bank sektorunun rolunu qeyd edib, Bankla əlaqələrin inkişafı istiqamətləri barədə fikirlərini bölüşüb.
Türkiyə Banklar Birliyinin İdarə Heyətinin sədri, “Ziraat Bank”ın baş direktoru Alpaslan Çakar Azərbaycanın işğaldan azad edilmiş ərazilərinin dirçəldilməsi layihələrində Türkiyə şirkətlərinin fəal iştirakını, iş birliyinin iqtisadi əməkdaşlığa, biznesin canlanmasına, yeni müəssisələrin və iş yerlərinin açılmasına töhfə verəcəyini vurğulayıb, Bankın əlaqələrin genişləndirilməsində marağını ifadə edib.
Tərəflər “Ziraat Bank”ın Azərbaycandakı fəaliyyəti, ticarət və investisiya sahəsində tərəfdaşlığın gücləndirilməsi məsələlərini müzakirə ediblər.