Gün ərzində Cocuq Mərcanlıda 1471 qəlpə aşkar olunub VİDEO
Bakı, 31 mart, AZƏRTAC
Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) mütəxəssisləri martın 31-də Cəbrayıl rayonunun Cocuq Mərcanlı kəndində gün ərzində 1471 qəlpə aşkar ediblər. Mina və partlamamış hərbi sursat aşkar edilməyib. Ümumilikdə 7954 kvadratmetr ərazi (454 kvadratmetr əl ilə, 2700 kvadratmetr mexaniki üsulla və 4800 kvadratmetr minaaxtaran itlərin vasitəsilə ilə) yoxlanılıb.
ANAMA-dan AZƏRTAC-a bildiriblər ki, 45 gün ərzində agentlik tərəfindən Cəbrayıl rayonunun Cocuq Mərcanlı kəndində 151 evə və yeni avtomobil yolunun keçəcəyi əraziyə baxış olub. İyirmi iki partlamamış hərbi sursat (4 ədəd 82 millimetrlik “OF-832”, 2 ədəd 120 millimetrlik “OF-843” minaatan mərmisi, 3 ədəd 93 millimetrlik tank əleyhinə idarə olunmayan raket (2 ədəd “PQ-7VL” və 1 ədəd “PQ-7VM”), 2 ədəd 70 millimetrlik tank əleyhinə idarə olunmayan “PQ-7VM” raketi, 1 ədəd “PQ-7” raketinin partlamamış mühərrik hissəsi, 1 ədəd “F-1” əl qumbarası, 1 ədəd 100 millimetrlik “OF-412” top mərmisi və 8 ədəd “TM-62P3” minasının gücləndiricisi, 5 ədəd piyada əleyhinə “OZM-72” mina və 33 ədəd tank əleyhinə mina (9 tank əleyhinə “TM-57” minası və 24 ədəd “TM-57” tank əleyhinə minanın partladıcısı “MVZ-57”) aşkar olunaraq zərərsizləşdirilib. Baxış zamanı 1 milyon 275 min 441 kvadratmetr ərazi (423 min 154 kvadratmetr əl ilə, 363 min kvadratmetr mexaniki üsulla, 113 min kvadratmetr SENSYS dərinlik ölçən cihazı və 376 min 287 kvadratmetr minaaxtaran itlərin köməyi ilə) yoxlanılıb.
Ərazinin mina və partlamamış hərbi sursatlardan təmizlənməsi əməliyyatı davam etdirilir.
Agentlik tərəfindən yanvarın 1-dən martın 31-dək cəmi 5002 partlamamış hərbi sursat, tank əleyhinə 74 mina və piyada əleyhinə 8 mina aşkarlanaraq zərərsizləşdirilib. Ümumilikdə 1 milyon 330 min 75 kvadratmetr ərazi (477 min 788 kvadratmetr əl ilə, 363 min kvadratmetr mexaniki üsulla, 113 min kvadratmetr SENSYS dərinlik ölçən cihazı və 376 min 287 kvadratmetr minaaxtaran itlərlə) yoxlanılıb.
Bölmənin digər xəbərləri
