“Sabah”ın baş məşqçisi: Futbolçularım xarakter və əzmkarlıq göstərdilər
Bakı, 13 oktyabr, AZƏRTAC
Futbolçularının oyun ərzində göstərdikləri xarakteri və mübarizəni xüsusi vurğulamalıyam. Planı yerinə yetirdiklərinə, göstərdikləri əzmkarlığa, xarakterə və meydanda sona qədər mübarizə apardıqlarına görə oyunçularıma minnətdaram. Bu, bizim üçün möhtəşəm nəticədir. Komandamız Çempionlar Liqasında evdə ilk oyununu keçirdi, ilk qolunu vurdu, ilk dəfə qapısını toxunulmaz saxladı və ilk qələbəsini qazandı. Bundan daha yaxşı nə ola bilər?
AZƏRTAC xəbər verir ki, bu sözləri “Sabah”ın baş məşqçisi Valdas Dambrauskas UEFA Çempionlar Liqasının liqa mərhələsində Bakıda Çexiyanın “Slaviya Praqa” klubuna 2:0 hesabı ilə qalib gəldikləri II tur oyunundan sonra təşkil olunan mətbuat konfransında deyib.
Litvalı mütəxəssis ilk hissədə rəqibə qarşı yaxşı təzyiq etdiklərini bildirib: “Düşünürəm ki, xüsusilə oyunun əvvəlində yaxşı təzyiq göstərdik. Rəqibi təhlil etmişdik və onların oyun üslubuna uyğun olaraq taktiki düzülüşümüzü dəyişdik. İlk 20-25 dəqiqədə topa sahibolma göstəricimiz təxminən 68 faiz idi. Rəqibin arxadan oyun qurmaqda çətinlik çəkdiyini gördük, topu qazandıq və onu yaxşı qoruduq. Sonradan onlar da oyuna daha çox qoşuldular və topa sahibolma baxımından üstünlük təxminən bərabərləşdi. “Slaviya” fiziki cəhətdən çox güclü və yaxşı hazırlıqlı komandadır. Belə rəqiblərə qarşı boşluqlar tapmaq asan deyil. Onlar meydanın hər yerində rəqib futbolçuları təqib etdikləri üçün hücum qurmaq çətinləşir. Fasilədə bəzi zonalarda daha birbaşa oynamaq qərarına gəldik və bu, dərhal nəticəsini verdi. İkinci hissənin əvvəlində qol vurduq. Daha sonra da asan olmadı. Bir neçə epizodda bəxtimiz gətirdi. Ancaq Çempionlar Liqasında şans amili də vacibdir. Hesabda önə keçdikdən sonra özümüzü daha inamlı hiss etdik və ikinci qol üçün fürsət gözlədik. Nəhayət, həmin imkanı dəyərləndirdik”.
Baş məşqçi azarkeşlərə də müraciət edərək növbəti oyunlarda daha böyük dəstək gözlədiyini deyib. O, komandanın nəticə və xal vəd etmədiyini, lakin hər qarşılaşmada maksimum gücünü ortaya qoyacağını bildirib: “Növbəti oyunlarda tribunaların dəstəyini daha çox hiss edəcəyik. Düzünü desəm, bu gün stadionda daha çox azarkeş gözləyirdim. Çempionlar Liqasında, dünyanın ən böyük turnirində oynayırıq, Azərbaycanı və Bakını təmsil edirik. Buna görə də azarkeşlərin dəstəyinə ehtiyacımız var. Nəticə və ya xal vəd etməyəcəyəm. Ancaq hər oyuna hazır olacağımıza, ürəyimizi qoyacağımıza və sona qədər mübarizə aparacağımıza söz verirəm. Bunun kifayət edib-etməyəcəyini isə zaman göstərəcək. Bu gün gördünüz ki, göstərdiyimiz oyun üç xal qazanmağımıza imkan verdi. İndi bütün diqqətimizi qarşıdakı matça yönəltməliyik. Çünki Premyer Liqada “Qəbələ”yə səfərimiz çox çətin olacaq. Dortmund “Borussiya”sı haqqında isə bundan sonra düşünəcəyik”.
“Slaviya Praqa”nın futbolçularından birinin oyundan əvvəl “Qarabağ”ı ən asan rəqib hesab etməsi ilə bağlı suala cavab verən mütəxəssis bu fikirlərin komanda üçün əlavə motivasiya olmadığını söyləyib: “Biz oyundan əvvəl bu barədə danışmamışdıq. Düşünmürəm ki, həmin açıqlama bizi motivasiya etdi və ya təhqir olunduğumuzu hiss etdik. Kağız üzərində, bazar dəyərinə və tarixi nailiyyətlərə görə biz nisbətən gənc klubuq. Bəlkə də, Çempionlar Liqasında ən zəif komandalardan biri hesab olunuruq. Ancaq bu, meydanda da zəif olacağımız demək deyil. Bizim çox yaxşı komandamız və keyfiyyətli futbolçularımız var. Üstəlik, inkişaf etmək və qarşıdakı oyunlarda daha yaxşı çıxış etmək üçün böyük potensialımız mövcuddur. Əsas məqsədimiz bu potensialı meydanda göstərmək və həm Çempionlar Liqasında, həm də ölkə çempionatında hər oyunda bunun üçün çalışmaqdır”.
Qeyd edək ki, “Sabah” növbəti turda Bakı Olimpiya Stadionunda Almaniya təmsilçisi “Borussiya Dortmund”la qarşılaşacaq.
Fotoqraf - Tofiq Babayev
Bölmənin digər xəbərləri
