Azərbaycan-Kamboca münasibətlərində yeni mərhələ üçün siyasi və iqtisadi zəmin mövcuddur
Bakı, 13 oktyabr, AZƏRTAC
Prezident İlham Əliyevin Kambocanın Baş naziri Hun Manetin Azərbaycana səfəri zamanı verdiyi bəyanat və iki ölkə arasında əldə olunan razılaşmalar Azərbaycan-Kamboca münasibətlərinin inkişafında yeni mərhələnin əsasını qoyur.
Bunu AZƏRTAC-a açıqlamasında Milli Məclisin deputatı Sevil Mikayılova söyləyib.
İqtisadi-siyasi əlaqələrin genişləndirilməsinin və humanitar əməkdaşlığın inkişafının tərəfdaşlığın əsas istiqamətləri kimi çıxış etdiyini deyən S.Mikayılova bildirib ki, Azərbaycanın xarici siyasətində Asiya, xüsusilə də Cənub-Şərqi Asiya ölkələri ilə əlaqələrin genişləndirilməsi mühüm yer tutur.
“Rəsmi məlumatlara görə, iki ölkə arasında ticarət dövriyyəsi 2022-ci ildə 3,25 milyon dollar, 2023-cü ilin yanvar-sentyabr aylarında isə 3,93 milyon dollar təşkil edib. Bu göstəricilər iqtisadi münasibətlərin genişləndirilməsi üçün əhəmiyyətli potensialın olduğunu göstərir. Prezident İlham Əliyevin də vurğuladığı kimi, tərəflər arasında ticarət əlaqələrinin canlandırılması üçün imkanlar mövcuddur, lakin qarşılıqlı məlumat çatışmazlığının aradan qaldırılması və biznes dairələri arasında birbaşa təmasların artırılması vacibdir. Hun Manetin Azərbaycana səfəri çərçivəsində keçirilən biznes forumu və yaradılması razılaşdırılan birgə işçi qrupu bu baxımdan mühüm əhəmiyyət daşıyır. Azərbaycanın və Kambocanın sahibkarlarının bir araya gəlməsi qarşılıqlı maraqların müəyyənləşdirilməsinə, investisiya imkanlarının araşdırılmasına və yeni layihələrin formalaşdırılmasına kömək edə bilər. Sənaye, turizm, nəqliyyat, təhsil və rəqəmsal transformasiya sahələrində əməkdaşlığın genişləndirilməsi iqtisadi əlaqələrin şaxələndirilməsi üçün əlverişli zəmin yaradır”, - deyə o əlavə edib.
Deputat vurğulayıb ki, səfər zamanı Azərbaycan və Kamboca arasında sənədlərin mübadiləsi də iqtisadi və institusional əməkdaşlığın inkişafına yönələn mühüm addımdır. İkiqat vergitutmanın aradan qaldırılması haqqında saziş biznes subyektlərinin fəaliyyətini asanlaşdırmaq, vergidən yayınmanın qarşısını almaq və qarşılıqlı investisiyalar üçün daha əlverişli şərait yaratmaq baxımından əhəmiyyətlidir. Ticarət və iqtisadi əməkdaşlıq haqqında Çərçivə Sazişi isə iqtisadi əlaqələrin genişləndirilməsi və ticarət dövriyyəsinin artırılması üçün hüquqi zəmin formalaşdırır. Bu sənədlərin real nəticələr verməsi üçün qarşılıqlı ticarətin təşviqi, sahibkarlar arasında əlaqələrin gücləndirilməsi və birgə istehsal imkanlarının araşdırılması vacibdir. Coğrafi məsafə müəyyən çətinliklər yaratsa da, müasir nəqliyyat və rəqəmsal texnologiyalar bu maneələrin təsirini azalda bilər. Əsas məsələ əldə olunan razılaşmaların konkret iqtisadi layihələrə çevrilməsidir.
Humanitar və təhsil əməkdaşlığı
“İkitərəfli münasibətlərin digər mühüm istiqaməti humanitar və təhsil əməkdaşlığıdır. Sovet İttifaqı dövründə yüzlərlə kambocalı tələbənin Azərbaycanda təhsil alması iki ölkə arasında mövcud olan tarixi əlaqələri göstərir. ADA Universiteti ilə Kambocanın Diplomatiya və Beynəlxalq Əlaqələr Milli İnstitutu arasında əməkdaşlıq haqqında Anlaşma Memorandumunun mübadiləsi bu sahədə yeni imkanlar yaradır. Təhsil mübadiləsinin genişləndirilməsi, tələbə və mütəxəssislər arasında əlaqələrin qurulması qarşılıqlı anlaşmanın güclənməsinə xidmət edə bilər. Eyni zamanda, Azərbaycanın ASAN xidmət modelinin Kambocada maraq doğurması ölkəmizin dövlət idarəçiliyi sahəsindəki təcrübəsinin beynəlxalq səviyyədə paylaşılması baxımından əhəmiyyətlidir”, - deyə o qeyd edib.
Prezident İlham Əliyevin bəyanatında mina təhlükəsi və təhlükəsizlik məsələlərinə də xüsusi yer ayrıldığını deyən S.Mikayılova diqqətə çatdırıb ki, hər iki ölkənin mina probleminin ağır nəticələri ilə üzləşməsi bu sahədə təcrübə və bilik mübadiləsini aktual edir. Azərbaycanın işğaldan azad edilmiş ərazilərində mina təhlükəsinin aradan qaldırılması, bərpa işlərinin aparılması və Böyük Qayıdış Proqramının həyata keçirilməsi bu istiqamətdə beynəlxalq əməkdaşlığın əhəmiyyətini artırır. Dövlət başçısının sülh və təhlükəsizliyin beynəlxalq hüquq, suverenlik və ərazi bütövlüyü prinsiplərinə əsaslanmalı olduğu barədə fikirləri də iki ölkənin beynəlxalq münasibətlərə yanaşmasında ortaq məqamları önə çıxarır. Bu prinsiplərə hörmət dövlətlər arasında etimadın möhkəmləndirilməsi və sabit əməkdaşlıq mühitinin formalaşdırılması baxımından mühüm əhəmiyyət daşıyır.
“Beləliklə, Azərbaycan və Kamboca arasında münasibətlərin inkişafı üçün həm siyasi zəmin, həm də yeni iqtisadi imkanlar mövcuddur. Hun Manetin Azərbaycana səfəri çərçivəsində əldə olunan razılaşmalar bu potensialın reallaşdırılması üçün əlavə imkanlar yaradır. Qarşıdakı mərhələdə əsas hədəf siyasi dialoqu konkret iqtisadi nəticələrlə möhkəmləndirmək, ticarət dövriyyəsini artırmaq, investisiya əməkdaşlığını genişləndirmək və humanitar əlaqələri daha da inkişaf etdirməkdir”, - deyə deputat fikrini yekunlaşdırıb.
Bölmənin digər xəbərləri
