Azərbaycan-Qırğızıstan əməkdaşlığı Türk dünyasında tərəfdaşlıq mühitinin möhkəmlənməsinə töhfədir ŞƏRH
Bakı, 13 oktyabr, AZƏRTAC
Azərbaycan ilə Qırğızıstanın ortaq soy-kök, mədəni-mənəvi dəyərlər, dil, dinə əsaslanan əlaqələri gündən-günə genişlənməkdədir.
AZƏRTAC xəbər verir ki, bu fikirləri Milli Məclisin deputatı, Mədəniyyət komitəsi sədrinin müavini Günay Əfəndiyeva söyləyib.
O bildirib ki, Prezident İlham Əliyev ilə Qırğız Respublikasının lideri Sadır Japarovun qardaşlıq münasibətləri, qarşılıqlı dövlət səfərləri, sıx görüşləri iki ölkənin tarixi bağlarının yüksək etimad və həmrəylik ruhunda davam etməsində vacib rol oynayır.
Son illərdə iki dövlətin mədəni-humanitar əlaqələrinin möhkəmləndirilməsi yönündə əhəmiyyətli addımların atıldığını vurğulayan Günay Əfəndiyeva bildirib: “Ölkələrimizdə ənənəvi şəkildə qarşılıqlı mədəniyyət günləri təşkil olunur. Həmrəyliyimizin ən gözəl nümunələrindən biri kimi Ağdamda Qırğızıstanın dəstəyi ilə "Manas" məktəbi tikilib. Bişkekdə Azərbaycan–Qırğızıstan Dostluq Parkı yaradılıb. Bakıda böyük Çingiz Aytmatovun abidəsi ucaldılıb, onun adını daşıyan park salınıb. Çingiz Aytmatovun əsərləri Azərbaycan teatrlarında böyük uğurla nümayiş olunur. Digər tərəfdən, şəhərlərimiz, o cümlədən Şuşa ilə Çolpon-Ata, Qəbələ ilə Karakol, Gəncə ilə Oş arasında qardaşlıq əlaqələri qurulur. İssık-Kulun sahilində Azərbaycanın inşa etdiyi "Bakı" hoteli fəaliyyətinə başlayıb. Bütün bu təşəbbüslər Azərbaycan və qırğız xalqlarının bir-birinə daha da doğmalaşmasına, ortaq dəyərlər ətrafında daha sıx birləşməsinə imkan yaradır".
O əlavə edib ki, Azərbaycan-Qırğızıstan ikitərəfli əməkdaşlığı, həmçinin Türk dünyasında və bütövlükdə regionda tərəfdaşlıq mühitinin möhkəmlənməsinə önəmli töhfə verir.
Bölmənin digər xəbərləri
