CƏMİYYƏT
Dövlət Sərhəd Xidmətinin Xüsusi Məktəbinə kursant qəbulu ilə bağlı imtahan keçirilib YENİLƏNİB VİDEO
Bakı, 6 aprel, Məhərrəm Əlioğlu, AZƏRTAC
Aprelin 6-da Dövlət Sərhəd Xidmətinin (DSX) Xüsusi Məktəbinin V sinfinə 2019-2020-ci tədris ili üçün kursant qəbulu ilə bağlı şagirdlərin imtahanı keçirilib.
AZƏRTAC xəbər verir ki, “Sərhədçi” İdman Olimpiya Mərkəzində keçirilən imtahanda 48 yer üçün 1227 uşaq imtahan verib. Bu da məktəblilərimizdə hərb sənətinə və sərhədçi peşəsinə marağın artmasından xəbər verir.
Tam şəffaf və aşkarlıq şəraitində keçən imtahan Azərbaycan dili və riyaziyyat fənləri üzrə test üsulu ilə aparılır.
İmtahanın gedişini Dövlət Sərhəd Xidmətinin rəisi, general-polkovnik Elçin Quliyev və şagirdlərin valideynləri də izləyiblər.
Dövlət Sərhəd Xidmətinin Aparat rəhbəri, general-mayor Elçin İbrahimov jurnalistlərə müsahibəsində bildirib ki, Xüsusi Məktəbdə təhsil almaq üçün 1227 nəfər müraciət edib. Məktəbdə kursant yerinin sayı 48-dir. Göründüyü kimi, konkurs bir yer üçün 26 nəfərdir. Bu rəqəmlər DSX-nin Xüsusi Məktəbinin nüfuzunun artmasının göstəricisidir. Bu nüfuzun arxasında Dövlət Sərhəd Xidmətinin Xüsusi Məktəbinin 2011-ci ilin oktyabrında Heydər Əliyev Fondu tərəfindən əsaslı təmir edildikdən, zəruri tədris bazası ilə təchiz olunduqdan sonra DSX-nin balansına verilməsi və həmin il oktyabrın 18-də açılış mərasimində Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın iştirak etməsi olub.
E.İbrahimov deyib ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin 2014-cü il 22 may tarixli Fərmanı ilə məktəbə xüsusi təyinatlı təhsil müəssisəsi statusu verilib. “Azərbaycan Respublikasının Dövlət Sərhəd Xidmətinin Xüsusi Məktəbinin Nizamnaməsi”nə əsasən, Dövlət Sərhəd Xidmətinin Xüsusi Məktəbinin vəzifəsi - kursantların maraq və potensial imkanları, fərdi xüsusiyyətləri nəzərə alınmaqla, onların zəruri biliklərə və həyat bacarıqlarına yiyələnmələrini, milli-mənəvi dəyərlərə malik, sağlam, vətənpərvər, müasir dünya görüşlü şəxsiyyət kimi formalaşmalarına, Dövlət Sərhəd Xidmətinin Akademiyası üçün hazırlanmalarını təmin etməkdir. Bu məktəbin yaranması, 2007-ci ildə DSX Akademiyasının təsis edilməsi və fəaliyyətə başlaması nəticəsində Dövlət Sərhəd Xidmətində mükəmməl hərbi təhsil sistemi formalaşıb. Kursantlar Xüsusi Məktəbdə yeddi illik təhsil aldıqdan sonra DSX Akademiyasında dörd il təhsil alırlar. Bundan sonra onlar leytenant hərbi rütbəsi alaraq dövlət sərhədində xidməti-döyüş fəaliyyətinə başlayırlar. Bir müddətdən sonra onlar növbəti təhsil pilləsinə - akademik kurslara cəlb olunur və ikiillik təhsildən sonra DSX-nin peşəkar zabit korpusunun tərkib hissəsi kimi öz fəaliyyətlərini davam etdirirlər.
İmtahanda 12 yaşadək uşaqların iştirak etdiklərini deyən general-mayor bildirib: “Orta məktəbin 4-cü sinfini bitirən şagirdlərdən Xüsusi Məktəbə qəbul olunanlar bu ilin sentyabrından 1-ci kursda, yəni, 5-ci sinifdə təhsilə başlayacaqlar. Əsas məqamlardan biri də ondan ibarətdir ki, ötən il martın 5-də Dövlət Sərhəd Xidmətinin Xüsusi Məktəbinin Heydər Əliyev Fondunun təşəbbüsü ilə inşa olunan yeni korpusunun açılış mərasimində iştirak edən Birinci vitse-prezident, Heydər Əliyev Fondunun prezidenti Mehriban xanım Əliyeva kursantların tədrisi və yaşayışı üçün yaradılmış şəraitlə tanış olub, tapşırıq və tövsiyələrini verib. Bizim də vəzifəmiz Xüsusi Məktəbin fəaliyyətini gündən-günə inkişaf etdirmək, onun zəruri pedaqoji imkanlarını, maddi-texniki bazasını daha da genişləndirməkdən ibarətdir. İlk dəfədir ki, bu cür imtahan keçirilir. Valideynlərin övladlarının imtahan prosesini şəxsən müşahidə etmələrinin əsas məqsədi odur ki, onlar imtahanın tam şəffaf keçirilməsinə şahid olsunlar. İmtahanda hər biri 5 balla qiymətləndirilən 60 sual verilir. Ən yüksək bal toplayan 48 nəfər bu ilin sentyabrından DSX-nin Xüsusi Məktəbinin birinci kursunda təhsilə başlayacaqlar. İkinci mərhələdə isə onların ailələri ilə bağlı öyrənmə tədbirləri keçiriləcək, tibbi yoxlanış aparılacaq. İmtahanın cavabları qısa müddətdə elan ediləcək. Valideynlərin hər hansı müraciətlərinin, suallarının cavablandırılması üçün xüsusi komissiya təşkil olunub. Bütün müraciətlərə dərhal baxılacaq və yerindəcə qərar qəbul olunacaq. Təcrübə göstərir ki, DSX Xüsusi Məktəbinə müraciətlərin sayı əhəmiyyətli dərəcədə artır. Güman edirəm ki, DSX-nin zabit heyəti ilə komplektləşdirilməsi ehtiyacı nəzərə alınaraq məktəbdə yerlərin sayı artırıla bilər”.
Xatırladaq ki, məktəbə qəbulla əlaqədar sənədlərin qəbulu bu il fevralın 15-dək həyata keçirilib.
DSX Xüsusi Məktəbinin fəaliyyətə başlaması ilə Azərbaycan Respublikasının sərhəd təhlükəsizliyini təmin edəcək ixtisaslı zabit kadrların hazırlanması üçün 11 illik, bundan sonra isə zabitlərin ixtisas artırması üçün ikiillik akademik kurslardan ibarət təhsil dövrünü əhatə edən mükəmməl hərbi tədris sistemi formalaşıb.